Рөстәм Миңнеханов: Икътисадый вәзгыятьнең тотрыклы булуы республика алдында торган мәсьәләләрне хәл итәргә мөмкинлек бирәчәк

Бүген Татарстан Президенты Рөстәм Миңнеханов ТР Кукмара муниципаль районында эш сәфәрендә булды. Республика башлыгы Кукмара шәһәр тибындагы бистәдә гражданнарны авария хәлендәге йортлардан күчерү программасы кысаларында төзелгән яңа йортларны карады.

Аннары Татарстан Президенты Рөстәм Миңнеханов “Кукмара металл савыт-саба заводы” ААҖ ндә булды. Аңа завод продукциясе тәкъдим ителде, җитештерү цехлары күрсәтелде. Кукмара металл савыт-саба заводы 60 еллык тәҗрибәгә ия һәм бүгенге көндә Россиянең төп алюмин савыт-саба җитештерүчеләренең берсе булып тора.

Аннары республика башлыгы Кукмара районы Советы утырышында катнашты. Очрашуда ТР Дәүләт Советы Рәисе урынбасары Римма Ратникова, ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов, ТР Муниципаль берәмлекләр советы рәисе Миңсәгыйть Шакиров һ.б. катнашты.

Кукмара районы башлыгы Рауиль Рахматуллин районның эш нәтиҗәләренә багышланган доклад белән чыгыш ясады. Ул узган ел район Г.Тукайның тууына 125 ел тулуны билгеләп үтте, дип белдерде. Аның сүзләренә караганда, гомумән алганда, 2011 ел Кукмара районы өчен уңышлы булган.

Районда предприятиеләрнең җитештерүчәнлеге, җирле халыкның кереме арткан. Бүгенге көндә район буенча уртача хезмәт хакы 11951 сум. Кукмара металл савыт-саба заводында 678 кеше эшли, уртача хезмәт хакы – 21692 сум тәшкил итә.

Кукмара районында яңа торак төзелеше актив бара. Хисап чорында барлыгы 28 меңнән артык кв.м. торак торгызылган. “Барлык республика программаларында да актив катнашабыз. Республика җитәкчелегенә районга күрсәтелгән ярдәм өчен рәхмәт белдерәбез, ышанычларын акларга тырышачакбыз”, - дип билгеләп үтте район башлыгы.

Кукмара районында “Бәләкәч” программасы буенча 3 яңа балалар бакчасы төзелгән, шулай ук балалар өчен 2 өстәмә группа ачылган. Р.Рахматуллин 140 урынлы тагын бер балалар бакчасы төзергә кирәклеген белдерде.

Районда берничә йөз йорт газлаштырылган. Гомумән алганда, икътисади күрсәткечләр үсеше күзәтелә: мөгезле эре терлек саны, сөт җитештерү күләме арткан, гаилә фермалары актив үсеш ала.

Рөстәм Миңнеханов үз чыгышында районда башкарылган эшләргә уңай бәя бирде. “Кукмара районы уңышларына шатбыз, дип билгеләп үтте ТР Президенты. – Биредә яңа йортлар актив төзелә, предприятиеләр яхшы табыш китерә, гаилә фермалары үсеше күзәтелә, әмма киләчәктә дә башкарыласы эшләр күп. Кукмара районында булган эш тәҗрибәсен кулланырга кирәк, ул башкалар өчен үрнәк булырга тиеш”.

Республика башлыгы сүзләренә караганда, Кукмара районы зур булмаган фермерлык хуҗалыкларында ничек эш алып баруы буенча үрнәк булып тора. Ул нәкъ менә бу районда иң яхшы киез итекләр басыла, моннан тыш, металл савыт-саба җитештерү буенча эш җайга салынган дип белдерде.

“Әгәр халык эшләргә тели һәм максат куя икән барысы да булачак”, - дип билгеләп үтте Р.Миңнеханов. Аның сүзләренә караганда, бүген Татарстан Россиядә иң уңышлы төбәкләрнең берсе һәм бу уңышка федераль үзәкнең актив ярдәме белән ирешелде.

Утырыш ахырында ТР Президенты Кукмара районы хезмәтчәннәренә республика Дәүләт бүләкләре һәм Рәхмәт хатлары тапшырды.