ТР Президенты Яшел Үзәннең яңартылган Көнчыгыш су алу җайланмасы станциясендә булды

Бүген Татарстан Президенты Рөстәм Миңнеханов Яшел Үзәннең эчәргә яраклы суны чистартуның заманча алымнары кертелгән, реконструкция эшләре башкарылган Көнчыгыш су алу җайланмасы станциясендә булды.

“Водоканалсервис” ААҖ генераль директоры Алмаз Гәрәев ачыклык керткәнчә, әлеге районда яңа җайланманы сафка бастырганчы су тиешле таләпләргә җавап бирмәгән, анда тимернең күләме кирәгеннән күп тапкыр артып киткән.

“Водоканалсервис” ААҖ филиалы булган “Яшел Үзән-Водоканал” предприятиесе Яшел Үзән шәһәре, Васильево бистәсе һәм Әйшә авылында яшәүче 118 мең кешене, шулай ук 564 предприятие һәм оешманы эчәргә яраклы су белән тәэмин итә. Предприятиедә 320 кеше эшли.

Объектны төзекләндерү эшләре 2010 елда башлана, беренче чираттагы эшләрне башкаруга 42,9 миллион сум акча бүлеп бирелә. Әлеге акчаларга станция бинасы төзелә, суда тимернең күләмен киметү җайланмасы сатып алына һәм урнаштырыла, резерв су алу җайланмасы төзелә, 4 яңа скважина бораулана.

Икенче чираттагы эшләрне башкаруга республика бюджетыннан 45 миллион сум акча бүлеп бирелә. Бүгенге көндә 2 резервуар төзү өчен 20 миллион сумга якын акча кирәк.

Моннан тыш, хәзерге вакытта Яшел Үзәндә су үткәргеч челтәрләр бик нык тузганлыктан, су белән тәэмин итүгә бәйле катлаулы вәзгыять урнашты. Канализация коллекторларын төзекләндерү һәм яңартуга – 300 миллион, Яшел Үзәннең биологик чистарту корылмаларын модернизацияләүгә - 250 миллион, Көнбатыш, Көнчыгыш һәм Васильево су алу җайланмаларын реконструкцияләү эшләренә тагын 300 миллион сумга якын акча кирәк.