Рөстәм Миңнеханов: “Бары тик тотрыклылык кына илнең киләчәк үсешенә нигез булып тора”

Бүген ТР Яшел Үзән районы Советының XVI сессиясендә 2011 елга нәтиҗә ясадылар. Сессиядә Татарстан Президенты Рөстәм Миңнеханов катнашты.

“Бер елда гражданнардан язма рәвештә 4 мең, ә интернет аша 750 мөрәҗәгать кабул ителгән. Киләчәктә заманча технологияләр төп элемтә чарасы булыр дип ышанам”, - дип башлады докладын район башлыгы Сергей Батин.

Ул район икътисады динамик үсеш ала, ә кайбер күрсәткечләр буенча сизелерлек уңышларга иреште дип билгеләп узды.

“Республика һәм федераль хөкүмәтнең җитди ярдәме белән финанс-икътисад кризис нәтиҗәләрен җиңә алдык. Соңгы ике елда сәнәгать производствосының тотрыклы үсеше күзәтелә. 2011 елда сәнәгать производствосы индексы 106,9 процент тәшкил итте”, - дип белдерде Сергей Батин.

Татарстан Президенты Рөстәм Миңнеханов үз чыгышында Яшел Үзән ел саен үзгәреш кичерә дип билгеләп үтте. “Чиста су, заманча клиника, автовокзал пәйда булды, алар барысы да районда тотрыклы икътисади вәзгыять нәтиҗәсе”, - дип билгеләп үтте ул.

ТР Президенты шулай ук узган елда республиканың икътисади күрсәткечләрен һәм уңышларын искәртте.

Рөстәм Миңнеханов узган ел 20 елга беренче тапкыр демографик вәзгыять уңай якка үзгәрүен билгеләп үтте. “1991 елдан башлап ул кадәр бала туганы юк иде. Дөньяда иң зур кыйммәт – кешеләр, ә нефть түгел. Нәкъ менә кешеләр сәламәт һәм белемле булырга тиеш”, - диде Татарстан Президенты.

ТР Президенты сайлау алды темасын да игътибарсыз калдырмады. “Ил үзенән үзе үзгәрми. Исегезгә төшерегез, илебез 20, 10, хәтта 5 ел элек нинди иде. Бу вакытта Россия һәм безнең республика үзгәрешләр кичермәдемени? Ил – ул барыннан да элек без үзебез. Әгәр безгә барысы да начар кебек тоела икән, димәк безнең һәрберебез үз урынында начар эшли. Барыннан да элек үзебезгә бәя бирәбез. Бер генә революция дә халыкны бәхетле итмәде, бары тик тотрыклылык кына илнең киләчәк үсешендә нигез булып тора”, - диде Рөстәм Миңнеханов.