Владимир Путин Яр Чаллыда Рөстәм Миңнеханов белән очрашты

Кичә Россия Премьер-министры Владимир Путин Чаллыга рәсми сәфәре кысаларында Татарстан Президенты Рөстәм Миңнеханов белән очрашты.
Республика башлыгы Россия Премьер-министрына Татарстанда федераль программаларның гамәлгә ашырылуы хакында сөйләде, Татарстанның аларның барысында да диярлек катнашуын ассызыклады.

Владимир Путин республиканың уңышларын билгеләп үтте, Татарстанның күп кенә күрсәткечләр буенча лидерлар рәтендә баруын әйтте. “Бу ачыктан-ачык күзгә күренеп торган факт, әмма медицинада да, торак-коммуналь хуҗалыгы өлкәсендә дә проблемалар бар әле”, - диде ул.

Рөстәм Миңнеханов аның белән килеште һәм хәзерге вакытта Татарстанда югары технологияле производстволарның булуы зур әһәмияткә ия икәнлеген искәртте. “КАМАЗ”ны, махсус икътисади зонаны, нефть химиясе сәнәгатен, Кама сәнәгать кластерын үстерү күбрәк керем алырга, яңа эш урыннары булдырырга мөмкинлек бирәчәк”, - дип өстәде ул.

Татарстан Президентының сүзләренә караганда, социаль проектлардан республика өчен торак төзелеше һәм мәктәпләрне капиталь ремонтлау аеруча мөһим. Республикада моннан 30 ел һәм аннан да элегрәк төзелгән 780 нән артык мәктәп бар.

Рөстәм Миңнеханов шулай ук Татарстанда укытучылар өчен күп нәрсә эшләнүен: электрон мәктәп системасы кертелүен, һәр мөгаллимнең ноутбуклар алуын билгеләп үтте.

“Хәзерге вакытта безнең бурыч – мәктәпләрне тәртипкә китерү һәм сәламәтлек саклау өлкәсендә беренчел звенога игътибар юнәлтү. Без югары технологияле медицинаны үстерү өчен күп нәрсә эшләдек һәм беренчел звеноны берникадәр читтә калдырдык. Шунлыктан быел әлеге бурычны хәл итү эшенә керешәчәкбез. Әгәр федераль үзәктән ярдәм булса, без бу бурычларны тагын да уңышлырак хәл итәчәкбез”, - диде Рөстәм Миңнеханов.