Рөстәм Миңнеханов Мәүлид бәйрәмендә катнашты

Бүген Казанда Кәрим Тинчурин исемендәге татар дәүләт драма һәм комедия театры бинасында Мөхәммәд пәйгамбәрнең туган көненә багышланган Мәүлид кичәсе үтте. Чараны ТР мөселманнары Диния нәзарәте оештырган иде.

Шуны билгеләп үтәргә кирәк: соңгы елларда Мәүлидне бәйрәм итү күбрәк таралыш ала бара. Бүген театр бинасында узган зур күләмле чара республикада узган Мәүлид бәйрәмнәренә йомгак ясау булып тора.

Әлеге тантаналы чарага ТР Президенты Рөстәм Миңнеханов, Россия мөселманнары Үзәк диния нәзарәте рәисе Шәйхелислам Тәлгать Таҗетдин, ТР мөселманнары Диния нәзарәте рәисе Илдус хәзрәт Фәизов, ТР Президентының дини берләшмәләр белән бәйләнешләр идарәсе башлыгы Марат Гатин, дин әһелләре, җәмәгать эшлеклеләре катнашты. Чара ТР Үзәк төбәге казые Мәхмүт хәзрәт Шәрәфетдинов тарафыннан Коръән сурәләре уку белән башланып китте.

Кичәдә мөнәҗәтләр, нәшидләр әйтелде, вәгазьләр сөйләнде, салаватлар һәм мәүлидләр әйтелде. Мөхәммәд пәйгамбәргә багышланган фильмнан өзекләр күрсәтелде. Анда пәйгамбәрләрдән соңгысы булган Мөхәммәд с.г.в.нең үзенең тугрылыклы, гүзәл әхлаклы булуы белән аерылып торуы бәян ителә.

Илдус хәзрәт Фәизов билгеләп үткәнчә, Мәүлид, аңа карата мәхәббәт тоту һәрдаим күңелдә саклана. “Бүген бу бәйрәмне ТР Президенты Рөстәм Нургали улы Миңнеханов шәрефләде, ямьләде. Бу бәйрәм Коръәнгә, сөннәткә мәхәббәтне арттырды. Безнең халык беркайчан да беркайчан да болардан аерылмаган. Шуңа күрә дә без бүген шундый бәрәкәткә ирештек”, - диде мөфти. И.Фәизов шулай ук мөфтиятнең 2012 елны Коръән елы дип игълан итүен хәбәр итте. “Мәүлид укыган вакытта, тынычлык, бәрәкәт, иминлек, бәхет-сәгадәт була”, - дип, И.Фәизов мәүлид укыды.

Шәйхелислам Тәлгать Таҗетдин тантанада катнашучыларны бөтен Россия мөселманнары исеменнән Мәүлид белән котлады. “Монда җыелуыбызның сәбәбе – Мөхәммәд пәйгамбәргә гыйбадәт итү түгел, аңа мәхәббәт китерү”, - дип белдерде мөфти, елдан-ел Мәүлидкә килүчеләрнең саны арта баруын билгеләп үтте.

Татарстанның Баш казые Җәлил хәзрәт Фазлыев үзенең вәгазендә Мөхәммәд пәйгамбәрнең бу җиргә гүзәл әхлакны тәмам урнаштыру өчен җибәрелгәнлеген хәбәр итте. “Без әхлагыбызны төзәтергә, яхшылыклар эшләп яшәргә тиеш. Аннан соң бер төрле мәхлукатка да зыян салмаска тиешбез”, - дип, ул мөселманның кулыннан да, теленнән дә башка кешеләргә зыян килмәскә тиешлеген ассызыклады.

ТР Төньяк-көнбатыш төбәге казые Сөләйман хәзрәт Зарипов сүзләренчә, Мөхәммәд пәйгамбәр кешеләргә шатлык китерә торган булган. Аны кешеләр дә, хайваннар да яраткан. Котыра торган хайваннар да туктап кала торган булган. “Ул каты күңелле кешеләрнең күңелләрен йомшарткан. Без дә, Мөхәммәд пәйгамбәргә охшап, игелек эшләсәк иде”, - диде Сөләйман хәзрәт Зарипов.

Шулай ук тамашачылар каршында Татарстанның халык артисты Зөһрә Сәхәбиева, яшь башкаручы Ширин әл-Әнси, “Сорнай” һәм “Җомга” ансамбльләре һ.б. чыгыш ясады.