Татарстан Президенты Казан духовный семинариясендә булды

Бүген Татарстан Президенты Рөстәм Миңнеханов Казан духовный семинариясендә булды. Ул семинария ректоры, Казан һәм Татарстан архиепискобы Анастасий озатуында сәнгать сыйныфында булып, студентлар белән аралашты, аларның нинди материаллардан файдалануы белән кызыксынды.

Шуннан соң республика башлыгы Изге Иоанн Кронштадский чиркәвендә булды, семинариянең ашханәсе һәм аудиторияләр белән танышты. Рөстәм Миңнехановка, аерым алганда, 18 компьютер белән җиһазландырылган информатика кабинетын күрсәттеләр. Республика башлыгы семинариянең Интернетта үз сайты булу-булмавы белән кызыксынды һәм уңай җавап алды.

Республика Президенты шулай ук семинария китапханәсендә булды, бүгенге көндә биредә 20 меңгә якын китап саклана. “Биредә Казанга бөтен Россиядән китерелгән газета-журналлар, революциягә кадәр чыккан китаплар бик күп”, - дип хәбәр итте архиепископ Анастасий. Р.Миңнеханов билгеләп үткәнчә, тарихи әсәрләрне саклау өчен китапханәнең электрон базасын үстерергә кирәк. “Бу – бәһасез хезмәтләр”, - дип ассызыклады Татарстан башлыгы.

Уку йорты белән танышканнан соң Татарстан Президенты дин әһелләре белән аралашты. Мактаулы кунакны Май чабу бәйрәме уңаеннан коймак белән сыйладылар.

Казан духовный семинариясе 1997 елда яңадан торгызыла. Аның ачылышына Мәскәү һәм бөтен Рус Париархы Алексий Икенче дә килә. Казан духовный семинариясенең ректоры - Казан һәм Татарстан архиепискобы Анастасий.

Казан духовный семинариясе – югары дини белем бирүче Татарстандагы бердәнбер уку йорты. Биредә фән докторы һәм кандидатлары фәнни дәрәҗәләренә ия югары квалификацияле укытучылар эшли.

Хәзерге вакытта семинариянең көндезге бүлегендә - 70, читтән торып уку бүлегендә 120 студент укый. Аларга 52 укытучы белем бирә.

Семинариядә шәһәр һәм Бөтенроссия күләмендәге фәнни конференцияләр үткәрелә, «Православный собеседник» журналы нәшер ителә, революциягә кадәр дөнья күргән 60 меңнән артык басманы үз эченә алган фәнни китапханәсе бар. Ул Идел буендагы шундый дәрәҗәдәге бердәнбер православие китапханәсе. Китапханәдә фәнни эш алып барыла, иске һәм яңа фондларның компьютер каталоглары төзелә.