Илдар Халиков бүген Биектау муниципаль районы Советы утырышында катнашты

ТР Премьер-министры Илдар Халиков бүген Биектау муниципаль районы Советы утырышында катнашты. Утырыш районның 2011 елда социаль-икътисади үсеш нәтиҗәләренә һәм 2012 елга бурычлар билгеләүгә багышланган иде.

Төп доклад белән чыгыш ясаган район башлыгы Рөстәм Кәлимуллин узган ел эре предприятиеләрдән җирле бюджетка килгән керемнең өлеше 33 процент, кече һәм урта бизнес предприятиеләреннән алынганы -51 процент, бюджет оешмаларыннан -14 процент булуын җиткерде. 2011 елда районда сәнәгатьтә җитештерү индексының 98,6 процент тәшкил итүен, предприятиеләрдән төяп озатылган продукция күләменең 3,78 млрд сум булуын хәбәр итте.

Узган ел район бюджетында керем өлешенең үтәлеш күләме 712,3 млн сумлык, чыгым өлешенең – 704,1млн сумлык булган. Үз керемнәре 260 млн сумнан артык булган. Аның үсеше, 2010 елга караганда, 19 процент тәшкил иткән. Уртача хезмәт хакы үсеше дә 19 процент булган – 16389 сумга җиткән.

2011 елда Биектауда җитештерелгән авыл хуҗалыгы продукциясенең тулаем күләме 1,3 млрд сум булган.

Рөстәм Кәлимуллин районда җитештерелүче авыл хуҗалыгы продукциясенең 40 процентка якынының шәхси хуҗалыкларга туры килүен хәбәр итте. Бүгенге көндә биредә 13 гаилә фермасы эшли, тагын 5 се төзелә. Район башлыгы гаилә фермалары санын тагын да арттырырга кирәк, дигән фикердә.

Илдар Халиков үз чыгышында узган ел республиканың икътисади үсешендәге казанышлар белән таныштырып, 1 трлн 250 млрд сумлык тулай төбәк продукты җитештерелүен, үсешне традицион предприятиеләрдән тыш, яңа масштаблы проектлар да тәэмин итүен җиткерде.

Шулай да Хөкүмәт башлыгы иң зур казаныш дип соңгы 20 елда беренче тапкыр республикада туучылар санының үлүчеләр санын узып китүен атады. Премьер-министр Татарстанда сәламәтлек саклау системасын модернизацияләү, камилләштерү буенча максатчан эш алып барылуына басым ясады. Узган ел бу максатларга республикада 8 млрд сумнан артык финанснлар юнәлдерелгән. Биектаудагы реконструкцияләнгән Үзәк район хастаханәсенең булуы һәм районның Казандагы югары технологияле медицина үзәкләренә якын урнашуы, Илдар Халиков фикеренчә, төбәк халкының гомер озынлыгын арттырырга ярдәм итәчәк.

Премьер-министр сүзләренчә, актив тормыш рәвеше алып бару, физкультура һәм спорт белән шөгыльләнү мәсьәләләре дә актуаль булып кала. Аның белдерүенчә, халкының спорт белән шөгыльләнү дәрәҗәсе Биектау районы мөмкинлекләренә җавап бирми әле. Бу, беренче чиратта, эшне оештырудан тора, шулай ук спорт объектларының булуы да мөһим, алар төзеләчәк, ди премьер.

Республикада өстенлекле юнәлешләрнең берсе дип ул мәгарифне атады. Илдар Халиков бу өлкәдә мөһим программаларның гамәлгә ашырылуын, быел мәктәпләрне капиталь ремонтлау буенча яңа программаның старт алуын җиткерде. Хөкүмәт башлыгы Биектау районында укытучыларны стимуллаштыру практикасы кулланылуын, биредә укучыларның БДИ буенча яхшы нәтиҗәләр күрсәтүен аерым билгеләп узды.

Татарстан һәм Россия җитәкчелеге тарафыннан авыл хуҗалыгына ярдәмгә аерым игътибар бирелә. Премьер-министр республиканың бу максатларга федераль акчалар алу буенча лидер булуын искәртте.

Илдар Халиков районны ярдәм формаларын файдаланып, гаилә фермаларын һәм крестьян хуҗалыкларын үстерү программасында актив катнашырга чакырды. Ул социаль-икътисади үсешкә кагылышлы башка масштаблы проектларга: күпфатирлы йортларны капиталь ремонтлау, Бөек Ватан сугышы ветераннары өчен торак төзелеше, гражданнарны авария хәлендәге тораклардан күчерү, социаль ипотека программаларына да тукталды. “Соңгы ел ярым вакыт эчендә районга килгән инвестицияләр исемлеге зур. Бүленгән акчаларны кыска вакыт эчендә үзләштерүегез мөһим”, - диде Хөкүмәт башлыгы район җитәкчеләренә.

Илдар Халиков район халкына хезмәтләре өчен рәхмәт сүзләре җиткереп, бертөркем хезмәтчәннәргә дәүләт бүләкләрен тапшырды.