Рөстәм Миңнеханов: Фән һәм сәнәгать, югары уку йортлары һәм предприятиеләр арасында үзара хезмәттәшлек урнаштыру мөһим

Бүген Татарстан Президенты Рөстәм Миңнеханов Казан федераль университетының профессор-укытучылар составы, аспирантлар һәм студентлар активы белән очрашты.

КФУ ректоры Илшат Гафуров очрашуда билгеләп үткәнчә, бүгенге көндә университетның нәкъ менә федераль университет сыйфатында формалашуын ышаныч белән әйтергә мөмкин. Бүгенге көндә КФУның гаять зур милек комплексы – 580 нән артык күчемсез милек объекты, аның составында 16 институт, 5 факультет бар, фәнни-техник һәм матди база сизелерлек яхшыртылган. КФУда 28 төп фәнни юнәлеш буенча тикшеренүләр алып барыла, докторантлар һәм аспирантлар әзерләнә. Шушы вакыт эчендә әйдәп баручы дүрт фәнни мәктәп РФ Президенты грантлары буенча дәүләт ярдәме алды. Үзенә “Инновацион эшчәнлек үзәге” фәнни-технология паркын, Мәгълүмати технологияләр һәм системалар югары мәктәбен, бизнес-инкубаторны, кече предприятиеләр поясын һәм башка структур бүлекчәләрне берләштергән заманча инфраструктура булдырылган. Ректорның сүзләренә караганда, университетта уртача хезмәт хакы Идел буе федераль округы вузлары арасында иң югарысы – 30 мең 600 сум.

Ректор республиканың сәнәгать предприятиеләре белән хезмәттәшлекне төп проблемаларның берсе дип атады. Аның фикеренчә, бүгенге көндә университет базасында киң колачлы бурычларны хәл итү өчен полигон төзергә кирәк; КФУ Татарстанның әйдәп баручы компанияләре өчен фәнни базага әверелергә тиеш.

“Соңгы елларда вузларның үз тормышлары белән яшәүләре беркемгә дә сер түгел. Әмма бүген Россия Хөкүмәте әлеге проблемага җитди игътибар юнәлтте, без федераль университет статусын алуга ирештек”, - диде Татарстан Президенты очрашуда. Р.Миңнехановның сүзләренә караганда, бүген КФУ белән танышудан алган тәэсирләрне моннан элеккегеләре белән чагыштырып та булмый. “Без күптән түгел генә химия һәм физика институтларында булдык, андагы шартларны күреп кәефебез төште. Мондый шартларда сыйфатлы белем бирү, көндәшлеккә сәләтлелек турында сөйләү, кем беләндер ярышу мөмкин түгел. Бүген тәэсирләр бөтенләй икенче. Безнең дөньякүләм дәрәҗәдәге химия лабораториясе бар. Физика институтында 26 лаборатория булдырылган. Геология фәне буенча да планнарыбыз зурдан”, - дип ассызыклады ТР Президенты.

КФУның предприятиеләр белән үзара мөнәсәбәтләренә бәйле проблема хакында сөйләгәндә, республика башлыгы предприятие һәм вузларның төрле киңлекләрдә эшчәнлек алып баруын һәм белгечләр әзерләү дәрәҗәсенең еш кына базар чынбарылыгына туры килмәвен ассызыклады. Хәзерге вакытта кайбер чаралар күрелде, аерым алганда эре банклар КФУның Югары банк мәктәбе базасында белгечләр әзерләүгә кереште. ТР Президенты фикеренчә, шундый ук эш эре предприятиеләр белән дә алып барылырга тиеш. Р.Миңнеханов бу эштә ярдәм күрсәтергә вәгъдә итте. “Ай саен университетка компания директорларын алып киләчәкмен, алар КФУда булган фәнни эшләнмәләр хакында мәгълүмат алырга тиеш. Биредә нефтехимиклар, нефтьчеләр, машина төзүчеләр өчен гаять зур мөмкинлекләр бар. Боларның барысы да көч, тырышлык таләп итә. Кайбер кешеләр моңа әзер түгел, әмма һәркем әгәр без артта калсак, беркемгә дә кирәгебез калмаячагын аңларга тиеш. Безнең студентларның да кирәге булмаячак”, - диде республика башлыгы. “Татарстан фәне әйдәп баручылар рәтендә булырга тиеш, моңа ышаныч зур”, - дип белдерде Р.Миңнеханов.
ТР Президенты КФУга сәфәре кысаларында университетның технология үзәгендә, Геология һәм нефть-газ технологияләре институтында, А.М.Бутлеров исемендәге Химия институтында, Физика институтында һәм КФУның Югары банк мәктәбендә булды.