ТР Дәүләт Киңәшчесе "Ел хәйриячесе - 2011" конкурсының "Социаль яктан җаваплы булган ММЧ" номинациясендә җиңүчеләргә дипломнар тапшырды

2011 ел нәтиҗәләре буенча “Ел хәйриячесе” исеменә Татарстандагы 37 муниципаль берәмлектән 189 номинант дәгъва иткән. Иң күп заявкалар Казан, Чаллы һәм Түбән Камадан алынган. Номинантлар узган ел социаль өлкәдәге проблемаларны чишү өчен 3 млрд сумга якын хәйрия ярдәме керткән. Конкурс комиссиясе шулар арасыннан 88 җиңүчене билгеләгән. Җиңүчеләр 7 номинациядә: “Күпьеллык партнерлык өчен”, “Изге эшләр гаранты”, “Иң яхшы хәйрия проекты”, “Иң яхшы коммерцияле булмаган хәйрия оешмасы”, “Хәйрия инициативасы”, “Хәйриячелек-тормыш рәвеше”, “Социаль җаваплылыктагы ММЧ” номинацияләрендә бәяләнгән. Бүген “Ел хәйриячеләр”ен Муса Җәлил исемендәге Татар дәүләт опера һәм балет академия театры бинасында хөрмәтләделәр. Тантанада ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, министрлык-ведомстволар, предприятие-оешмалар, муниципалитетлар җитәкчеләре, интернат-мәктәпләр, социаль приютлар директорлары, тәрбиягә балалар алган гаиләләр, ятим балалар катнашты. Чарага шулай ук “Беренче канал”да озак еллардан бирле “Пока все дома” тапшыруын алып баручы Тимур Кизяков чакырылган иде.

ТР Президенты, Хәйрия эшчәнлеге буенча республика советы рәисе Рөстәм Миңнеханов шәфкатьлелек үрнәге күрсәтүче хәйриячеләргә игелеклелек һәм киң күңеллелек өчен рәхмәт белдерде. “Сезнең ярдәм белән республикада хәйриячелеккә яңа позитив этәргеч бирәбез”, - дип ассызыклады ул.

Хәйрия ярдәме күрсәтүдә эре һәм урта предприятиеләр лидерлар. 2011 ел нәтиҗәләре буенча “Күпьеллык партнерлык өчен” номинациясендә “Татнефть”, “Газпром трансгаз Казан”, “КАМАЗ”, “Түбән Кама нефтехим”, “Татэнерго” җәмгыятьләре җиңү яулаган. Ә “Казан вертолет заводы”, “Казан моторлар төзү җитештерү берләшмәсе”, “ТАИФ” компанияләр төркеме, “Төньяк-Көнбатыш магистраль нефть үткәргечләр” җәмгыяте, “Зенит” банклар төркеме, “Мегафон”ның Идел буе филиалы”, “Таттелеком”, “Автоградбанк”, “Челтәр компаниясе”, “Алексеевскидорстрой”, “Минзәлә автотранспорт предприятиесе”, “РИТЭК” һ.б. “Изге эшләр гаранты” номинациясендә җиңү яулады. Аларга дипломнар һәм медальләрне Татарстан Президенты Рөстәм Миңнеханов тапшырды.

“Социаль җаваплылыктагы массакүләм мәгълүмат чарасы” номинациясендә “Татарстан” ДТРК, “Казан” телерадиокомпаниясе, “Нурлат” ТРК һәм “Бизнес Оnline” эшлекле электрон газетасы җиңү яулады. Аларны ТР Дәүләт Киңәшчесе Минтимер Шәймиев бүләкләде. “Бер-беребезгә мәрхәмәтлерәк булырга кирәк дигән кечкенә генә сигналны республика халкы тиз арада ишетте. Хәйриячеләр санының елдан-ел арта баруы сөендерә. Бу мәрхәмәтле эштә актив катнашучыларның барысына да рәхмәт”, - дип белдерде ул.

“Иң яхшы хәйрия проекты”, “Иң яхшы коммерцияле булмаган хәйрия оешмасы”, “Хәйрия инициативасы”, “Хәйриячелек-тормыш рәвеше” номинацияләре җиңүчеләре арасында Анжела Вавилова исемендәге иҗтимагый фонд, Татар дәүләт опера һәм балет академия театры, Истанбул шәһәре мэриясе, ТР Эчке эшләр министрлыгы, ТР Дәүләт симфоник оркестры, “АК БАРС СОЗИДАНИЕ”, “Хәйруллин” фондлары, крестьян-фермер хуҗалыклары, күмәк хуҗалыклар, шәхси затлар һ.б. бар. Аларның барысы да дипломнар һәм медальләр алды.

Бүген “Ел хәйриячесе - 2011” республика бәйгесе җиңүчеләрен хөрмәтләү тантанасында катнашкан ятим, инвалид, авыру балаларның күптәнге хыяллары да тормышка ашты. Сәхнәгә чакырылган бу балаларга хәйриячеләр хыялларын тормышка ашыру мөмкинлеген бүләк итте – сертификатлар тапшырды. Бүләкләр арасында Париждагы Дисней-лэндка сәяхәт, Мариин театрына сәфәр, спорт инвентарьлары, музыкаль үзәк һ.б. бар. Беренче республика балалар хосписы да “Татнефтепродукт”, “ Төньяк-Көнбатыш магистраль нефть үткәргечләр”, “Казан вертолет заводы”, “РИТЭК” җәмгыятьләреннән сертификат алды. “Татинвестгражданпроект” исә хәйрия ярдәме буларак балалар хосписының яңа бинасын проектлауны үз өстенә алачагын белдерә.