Казанда Универсиада-2013 партнерлары белән өч килешү имзаланды

Дөнья күләмендә билгеле өч компания 2013 елда Казанда узачак Бөтендөнья җәйге универсиадасының партнерлары булды. Бүген Казанда Уеннарның Оештыру комитеты утырышы кысаларында “Казан 2013” Башкарма дирекциясе” коммерцияле булмаган автоном оешмасының «Coca-Cola» системасы, «Хендэ Мотор СНГ» ҖЧҖ, «Макдоналдс» компанияләре белән партнерлыгы хакында ниятләр турындагы килешү имзаланды.

Килешүгә РФ Хөкүмәте Рәисенең беренче урынбасары, 2013 Уеннарның Оештыру комитеты башлыгы Игорь Шувалов, Татарстан Президенты Рөстәм Миңнеханов, Казан мэры Илсур Метшин катнашында кул куелды.

“Казан 2013” Башкарма дирекциясе” коммерцияле булмаган автоном оешмасы генераль директоры Владимир Леонов документка «Coca-Cola» компаниясенең Россиядәге спорт стратегиясе буенча глобаль директоры Стюарт Кросс, «Хендэ Мотор СНГ» ҖЧҖ генераль директоры Лим Бюн Квон һәм «Макдоналдс» компаниясенең үсеш һәм төзелеш буенча вице-президенты Виктор Эйдемиллер белән бергә кул куйды.

2013 елгы Универсиаданы үткәрү өчен «Coca-Cola» компаниясе алкогольсез эчемлекләр, җиһазлар тәкъдим итәчәк, барлыгы 9 миллион доллар күләмендә ярдәм күрсәтәчәк.

«Хендэ Мотор СНГ» ҖЧҖ Универсиаданың генераль партнеры, транспорт чаралары белән рәсми тәэмин итүче булачак. Компания Казандагы Уеннарда транспорт хезмәтен оештыру өчен «Hyundai Solaris» һәм «Hyundai Sonata» маркалы 929 автомобиль, «Hyundai H-1» маркалы 122 микроавтобус һәм «Hyundai Universe» маркалы 344 автобус тәкъдим итәр дип көтелә.

“Макдоналдс” компаниясе исә 2013 елгы Универсиаданың рәсми партнеры булачак.

Килешүгә кул куйганнан соң Уеннарның яңа партнерлары катнашында түгәрәк өстәл узды. И.Шуваловның сүзләренә караганда, Универсиадага кадәр иң катлаулы спорт объектларында төзелеш эшләрен тәмамлау, транспорт инфраструктурасын модернизацияләү, волонтерлар җәлеп итү эшен дәвам итү бурычы тора. “Универсиада вакытында Казан дөньядагы иң яхшы шәһәрләрнең берсенә әверелергә тиеш”, - дип ассызыклады беренче вице-премьер.

“Әгәр сезнең партнерлар, РФ һәм ТР Хөкүмәтләре арасында хезмәттәшлек итү буенча конкрет сорауларыгыз һәм тәкъдимнәрегез булса, без фикер алышуларга әзер”, - дип мөрәҗәгать итте Шувалов партнерларга.

Үз чиратында, Рөстәм Миңнеханов әлеге очрашуга һәм килешүгә кул куелуга бик тә шат булуын белдерде. “Безнең уртак эшебез нәтиҗәсендә Уеннар онытылмаслык тәэсирләр калдырыр дип өметләнәм. Бу шулай ук башка юнәлешләр буенча да безнең элемтәләрне тирәнәйтергә мөмкинлек бирәчәк, - дип ассызыклады ТР Президенты. – Без республикага, Хөкүмәткә, шәһәргә гаять зур җаваплылык йөкләнүен аңлыйбыз. Партнерлык аспектларын яхшылап өйрәнү өчен мөмкин булганның барысын да эшләячәкбез”.