Рөстәм Миңнеханов: "Курчак театры - балаларыбызга бүләк"

Бүген Казанда балаларның “Әкият” мәдәният үзәге тантаналы рәвештә ачылды. Ачылышта ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе урынбасары Римма Ратникова, ТР Премер-министры урынбасары Зилә Вәлиева, ТР Мәдәният министры Айрат Сибагатуллин, “Әкият” курчак театры директоры Роза Җаббарова һәм башка рәсми затлар катнашты.

ТР Президенты, балаларга һәм аларның ата-аналарына мөрәҗәгать итеп, бүген республика тормышында зур вакыйга булуын хәбәр итте. “Без балалар ата-аналары белән бергә килә алырлык урын булсын дип күптәннән хыялландык. Монда балалар ял итеп кенә калмасын, үсеш тә кичерсен. Бу бинаның идеясе безнең беренче Президентыбыз Минтимер Шәрип улы Шәймиев тарафыннан эшләнгән иде”, - дип, Рөстәм Миңнеханов һәм тантанада катнашучылар М.Шәймиевне алкышларга күмде.

“Башкарып чыккан эшебез уйлаганнан да яхшырак булып чыкты. Балаларыбыз өчен бик яхшы сарай барлыкка килде. Шуңа күрә без сезнең белән бергә шатланабыз. Ата-ана өчен баладан да кадерлерәк әйбер юк дип уйлыйм. Без балаларыбыздан берни дә җәлләргә тиеш түгел. Бу – безнең балаларыбызга бүләк. Аның рәхәтен күрегез, монда үзегезнең осталыгыгызны арттырыгыз. Ә без сезнең белән бергә шатланабыз”, - диде ТР Президенты.

Чараның тантаналы ачылышыннан соң кунаклар, балалар һәм ата-аналар “Буратино” һәм “Камыр батыр” спектакльләрен карарга китте.

Билгеле булганча, әлеге бина “Әкият” курчак театры өчен дип төзелә башлаган иде. Театрның матбугат хезмәтеннән алынган мәгълүматка караганда, 2008 елның 3 октябрендә Татарстанның беренче Президенты Минтимер Шәймиев тарафыннан бинаның нигез ташы салына.

Проект буенча бина әкияти замок кебек төзелгән. Ул ак таштан манаралар, үрелгән колонналар, декоратив башка элементлар белән баетылган. Бинаның тышкы ягы халык әкиятләрендәге төсле скульптур композицияләр белән бизәлгән.

ТР Төзелеш, архитектура һәм торак-коммуналь хуҗалык министры Ирек Фәйзуллин хәбәр иткәнчә, “Әкият” мәдәният үзәге бинасының проект бәясе 1 млрд. 300 млн. сумга төшкән. Бинаның гомуми мәйданы – 21,7 мең квадрат метр тәшкил итә – шуның 7 мең квадрат метр мәйданында “Әкият” курчак театры урнашкан.

1934 елда нигез салынган “Әкият” дәүләт курчак театры элеккеге чиркәү бинасында урнашкан иде. РФ һәм ТРның Атказанган мәдәният хезмәткәре Роза Җаббарова, РФ һәм ТРның Атказанган сәнгать эшлеклесе Илдус Зиннуров җитәкләгән курчак театры илнең бик күптәннән эшләп килә торган танылган коллективларыннан санала. Алар татар һәм рус телләрендә кырыклап спектакль куя. Әкиятләрдә төрле халыкларның тормыш-көнкүреше, тарихи һәм хәзерге заман вакыйлары чагылыш таба.

Калган мәйданнар балаларның үсеш үзәкләренә: сәнгать һәм музыка мәктәпләренә, иртә үсеш, график дизайн һәм яшь ЮХИДИ инспекторы мәктәпләренә бирелгән. Мәдәни үзәктә 250 һәм 100 урынга исәпләнгән ике зал, балалар кафесы, уен зоналары һәм сәүдә галереясе урнашкан.