Рөстәм Миңнеханов: "Һәр муниципалитет эшкуарлыкка ярдәм итәргә тиеш"

Республикада тулай төбәк продукты күләмендә кече һәм урта биснесның өлеше 25 процент тәшкил итә. “ Бу аз, әлеге күрсәткеч ике тапкырга күбрәк булырга тиеш, алга таба эшчәнлекне шуннан чыгып оештырырга кирәк”. Бүген ТР Инвестицион үсеш агентлыгының ел йомгакларына һәм перспективаларына багышланган коллегия утырышында катнашкан ТР Президенты шулай дип белдерде.
Рөстәм Миңнеханов кече һәм урта бизнеска ярдәм итү республика җитәкчелегенең генә түгел, һәр муниципалитетның бурычы, төбәкләрдә моны аңлау булырга, һәр муниципаль районда Башкарма комитет җитәкчесенең берәр урынбасары эшмәкәрлек проблемалары белән шөгыльләнергә тиеш, дигән фикердә. Һәр район, һәр ведомство эшмәкәрлек белән җитди шөгыльләнсен өчен, агентлыкның алып барган эшчәнлеге үрнәк булырга тиешлеген ассызыклый Рөстәм Миңнеханов. Ул республикада кече һәим урта бизнес өчен эре инфраструктура проектлары төзү буенча уңышлар булуга карамастан, аерым муниципалитетлардагы караштан канәгать булмавын җиткерде. “Әгәр эш системалы алып барылмый икән, аның нәтиҗәсе дә булмаячак. Бүген эшмәкәрлеккә ярдәм буенча яңа адымнар хакында да уйларга кирәк”, дип Президент Инвестицион үсеш агентлыгын бу өлкәдә үзен тармакара координация органы буларак күрсәтергә чакырды.
Республика башлыгы белдергәнчә, кече һәм урта бизнесны дәүләт заказына җәлеп итү буенча да агентлыкның роле үсәргә тиеш.
Республикада эшләүче заманча “Химград”, “Мастер” индустриаль парклары, IT-паркларны ул илдәге иң уңышлы проектларның берсе буларак атады. Эре предприятиеләр белән хезмәттәшлектә Кама “Мастер” индустриаль паркы, “Камские поляны” индустриаль парклары кебек кече, урта бизнес өчен уңышлы мәйданнар төзүнең уңышлы булуын, мондый мәйданнарның тагын да күбрәк булырга тиешлеген искәртте Президент. Шул ук вакытта урыннарда индустриаль парклар төзүдә шәхси эшмәкәрләрдә зур кызыксыну булуын да ассызыклады. Бүгенге утырышта муниципаль дәрәҗәдә инвестицияләр җәлеп итүдәге тәҗрибә белән Яшел Үзәндәге “М-7” шәхси индустриаль паркы генераль директоры Руслан Хәлилов уртаклашты. Ул шәхси финансларга төзелүче индустриаль паркларның һәр муниципалитетта яшәргә сәләтле булуын һәм мондый проектларның уртача 7 елда үзен акларлык дәрәҗәгә чыгуын кат-кат искәртте.
Рөстәм Миңнеханов бу җәйдә Казанда ачылачак Агропромпаркның авыл хуҗалыгы өлкәсендә эшләүче төрле формадагы хуҗалыклар өчен продукцияләрен сатуда зур ярдәм булачагына басым ясап, мондый мәйданнарны республиканың баш төбәкләрендә булдыру зарурлыгына да тукталды.
Президент фикеренчә, кече һәм урта бизнесны үстерү өчен барлык булган ресурсны файдалана белергә кирәк. Ул Татарстанда авыл хуҗалыгы, торак –коммуналь хуҗалык һ.б. тармакларда эшмәкәрлек үсеше өчен перспективалар зур, дип саный.
Утырышта яңгыраган чыгышларда эшмәкәрләр белән урыннардагы түрәләр арасында аңлашу булмауның үсешкә киртәләр тудыруы да күтәрелде. Рөстәм Миңнеханов мондый кыенлыкларга очрамас өчен ике арада эшчәнлекнең анык регламентын булдыру кирәклегенә басым ясады. Президент бүгенге зур очрашу эшмәкәрлекне үстерү өлкәсендә яңа этәргеч бирер дигән өметтә калып, һәр муниципалитетта бу өлкәгә караган программа булырга тиешлеген белдерде.