Рөстәм Миңнеханов: Иң көчлесе җиңәр дип өметләнәм

Бүген ил халкы Россия Президентын сайлый. Моңа кадәр узган Президент сайлауларыннан аермалы буларак, бу юлы Илбашы биш елга түгел, ә алты ел вакытка сайлана.

ТР Президенты Рөстәм Миңнеханов тормыш иптәше Гөлсинә ханым белән Туполев исемендәге Казан илкүләм тикшеренү техник универстетының (КАИ) беренче бинасында урнашкан 41 нче сайлау участогында тавыш бирде. Республика башлыгы соңыннан журналистлар белән әңгәмә барышында һәртөрле сайлауның дулкынландыргыч булуын искәртеп, Президентлыкка кандидатлар арасыннан иң көчлесе җиңеп чыгар дигән фикер белдерде.

“Яңа сайланган Президент ил, милләтләр турында уйланырга тиеш. Илебездә, республикабызда уңай якка күп кенә үзгәрешләр бара. Алга таба мондый үзгәрешләр күбрәк булырга тиеш”, - дип саный Татарстан башлыгы.

Башкаладагы әлеге 41 нче сайлау участогына 1512 сайлаучы беркетелгән. Яшәү урыныннан читтә тавыш бирү хокукы бирүче таныклык белән килүчеләрне исәпкә алганда, аларның саны күбрәк булачак. Узган елның 4 декабрендә үткән алтынчы чакырылыш РФ Дәүләт Думасына депутатлар сайлау вакытында бу участокта сайлаучыларның 60 проценттан артыгы гражданлык бурычын үтәргә килгән булган. Бу юлы участок сайлау комиссиясе әгъзалары халык тагын да активрак булыр, дигән өметтә.