Казанга эш визиты белән РФ сәнәгать һәм сәүдә министры вазифаларын башкаручы Денис Мантуров килде

Бүген Казанга ике көнлек эш визиты белән Россия Федерациясе сәнәгать һәм сәүдә министры вазифаларын башкаручы Денис Мантуров килде. “Казан” Халыкара аэропортында аны Татарстан Республикасы Президенты Рөстәм Миңнеханов, ТР сәнәгать һәм сәүдә министры Равил Зарипов һәм башкалар каршы алды.

РФ сәнәгать һәм сәүдә министры вазифаларын башкаручы Денис Мантуров сәфәренең төп максаты – “Югары технологияле продукция экспортына комплексы ярдәм күрсәтү механизмнарын үстерү турында”гы сәнәгать буенча Координация советы эшендә катнашу. Чара “Казан вертолет заводы” ААҖ территориясендә узачак.

Искәртеп үтәбез, сәнәгать буенча Координация советы утырышын РФ Сәнәгать һәм сәүдә министрлыгы, Татарстан Республикасы Хөкүмәте һәм ТР Сәнәгать һәм сәүдә министрлыгы оештыра.

Пленар утырышта Мәскәү, Чиләбе шәһәрләре, Удмуртия, Чуашстан, Мордовия Республикалары, Ульян, Свердловски, Курган һәм башка өлкәләрнең дәүләт хакимияте органнары вәкилләре, шулай ук “Ростехнологияләр” дәүләт концерны, “Радиоэлектрон технологияләр” концерны” ААҖ, “Оптик системалар һәм технологияләр” фәнни-җитештерү концерны ААҖ, “Берләштерелгән авиатөзелеш корпорациясе” ААҖ, “Туполев” ААҖ, “Оборонпром” Берләштерелгән сәнәгать корпорациясе” ААҖ, “Россия вертолетлары” ААҖ, “Берләштерелгән судно төзелеше корпорациясе” ААҖ топ-менеджменты, Татарстан Республикасы сәнәгать предприятиеләре җитәкчеләре катнаша.

Пленар утырыш башланыр алдыннан Денис Мантуров Рөстәм Миңнеханов һәм “Казан вертолет заводы” ААҖ җитәкчелеге озатуында җитештерү мәйданчыкларында булыр, Татарстан Республикасы машина төзелеше һәм оборона-сәнәгать комплексы предприятиеләре продукциясе урын алган күргәзмә белән танышыр дип көтелә.