Рөстәм Миңнехановның Һиндстанга сәфәр нәтиҗәләре буенча нефть эшкәртү белгечләреннән эшлекле төркем төзеләчәк

Якын көннәрдә «Reliance Industries» компаниясе (Һиндстан) белгечләре һәм Татарстан Республикасының кайбер нефть эшкәртү тармагы предприятиеләре вәкилләреннән торган эшче төркем оештырылачак. Бүген Татарстан Республикасы Президенты Рөстәм Миңнехановның Джамангар шәһәренә (Һиндстан, Гуджарат штаты) эш сәфәре барышында шундый килешү төзелде. Бу хакта ТР Президентының матбугат хезмәте хәбәр итә.
 Искәртеп узабыз, сәфәрнең төп максаты – Һиндастандагы иң заманча предприятиеләрнең берсе булган «Reliance Industries» компаниясенең нефть эшкәртү заводында производствоны оештыру белән танышу иде. Яклар шулай ук нефть химиясе һәм нефть эшкәртү өлкәсендәге хезмәттәшлек мөмкинлекләре хакында фикер алышты.
 Джамангар шәһәренең нефть эшкәртү комплексына сәфәре истәлеге итеп Рөстәм Миңнеханов нефть эшкәртү заводы янындагы агачлыкта манго агачы утыртты. Яшел зонада 100 меңнән артык манго агачы үсә, биредә боланнар, селәүсеннәр, тавислар яши, бу завод янында экологик вәзгыятьнең яхшы булуы хакында сөйли.
 Сәфәрдә Рөстәм Миңнехановны ТР Президентының Тышкы элемтәләр департаменты директоры – республика башлыгының халыкара мәсьәләләр буенча ярдәмчесе Искәндәр Мөфлиханов, “Татнефть” ААҖ генераль директоры Шәфәгать Тәхаутдинов, “ТАИФ” ААҖ генераль директоры Альберт Шиһабетдинов, “Татнефть” ААҖ генераль директорының беренче урынбасары Наил Мәганов озатып йөрде.