Илдар Халиков Россия транспорт министрлыгы коллегиясенең киңәйтелгән утырышында катнашты

Бүген Мәскәүдә РФ Транспорт министрлыгының киңәйтелгән коллегия утырышы узды. Очрашуны РФ транспорт министры Игорь Левитин үткәрде. Утырышта Россия Федерациясе Хөкүмәте рәисе урынбасары Дмитрий Рогозин, РФ мәгариф һәм фән министры Андрей Фурсенко, РФ Дәүләт Думасы депутатлары, РФ Президенты Администрациясе, Хисап һәм Иҗтимагый палаталар вәкилләре, Ростов, Мурмански һәм Новосибирски өлкәләре җитәкчеләре катнашты. Утырышта Татарстан Республикасын ТР Президенты вазифаларын башкаручы - ТР Премьер-министры Илдар Халиков тәкъдим итте.

2011 елда Россиядә транспорт комплексының социаль-икътисади үсешенә нәтиҗәләр ясау һәм 2012 елга планнар билгеләү очрашуның төп темасы булды.

“Шундый зур территориясе була торып, Россия транспорттан башка үсеш кичерә алмый”, - дип ассызыклады Дмитрий Рогозин үз чыгышында һәм әлеге өлкәдә амбициоз бурычлар кую һәм аларны хәл итүдән курыкмаска чакырды.

РФ транспорт министры Игорь Левитин утырышта катнашучылар алдында төп доклад белән чыгыш ясады. Ул илебездәге транспорт системасының хәзерге торышы, тимер юл, автомобиль һәм шәһәр, һава, диңгез транспорты тармакларында дәүләт сәясәтен гамәлгә ашыру хакында сөйләде. И.Левитин транспортка бюджеттан тыш инвестицияләрнең артуын билгеләп үтте.

Министр 2012 елда Россия Транспорт министрлыгы алдында торган кайбер бурычларны билгеләде. Алар арасында транспортны модернизацияләү, транспорт узелларын үстерү, юлларны ремонтлау һәм карап тоту, суднолар йөрешенең куркынычсызлыгын тәэмин итү, төбәк һәм җирле һава элемтәсен үстерү, шәһәр җәмәгать транспорты паркын яңарту һәм башка бурычлар бар.

ТР Президенты вазифаларын башкаручы - ТР Премьер-министры Илдар Халиков үз чыгышының башында Россия Транспорт министрлыгының Татарстан территориясендә гамәлгә ашырыла торган проектларга сизелерлек ярдәм күрсәткәне өчен рәхмәт белдерде. “Федераль хакимият һәм Татарстан Республикасы Хөкүмәтенең тыгыз хезмәттәшлеге нәтиҗәсендә республика транспорт комплексының үсеш темплары югары булып кала: Татарстан территориясеннән узучы федераль автомобиль юллары участоклары реконструкцияләнә, төбәк әһәмиятендәге автомобиль юллары челтәре үсеш кичерә, транспорт инфраструктурасы объектлары модернизацияләнә”, - диде Илдар Халиков.

Свияжски төбәкара мультимодаль логистика үзәге төзелә, 2013 елда Казанда узачак Бөтендөнья җәйге универсиадасына транспорт инфраструктурасын әзерләү проектлары гамәлгә ашырыла. Илдар Халиковның сүзләренә караганда, Уеннарга 170 илдән 13,5 меңнән артык спортчы һәм делегация әгъзалары, 1,5 мең журналист, 100 меңгә якын турист һәм җанатарлар килүе көтелә.

Татарстанда транспорт хезмәте күрсәтүне уңайлы һәм нәтиҗәле оештыруга аерым игътибар бирелә. “Казан” Халыкара аэропорты Универсиадада катнашучылар һәм кунакларның рәсми килү һәм китү пункты итеп билгеләнгән. 2012 елда аэропортның яңа бинасын төзү эшләре төгәлләнәчәк. Терминалның мәйданы 19 мең квадрат метрдан артык тәшкил итәчәк, аның аша елына 1,2 миллион пассажир үтәчәк.

Татарстан Республикасының “Россия тимер юллары” ААҖ белән актив хезмәттәшлеге нәтиҗәсендә “Казан” станциясен модернизацияләү һәм аэропортта аэроэкспресс терминалын төзү эшләре алып барыла. 2012 елда 6 миллиард сумнан артык акча үзләштерү күздә тотыла.

“Безнең алда Казанның транспорт потенциалын, шул исәптән тимер юл транспорты ярдәмендә пассажирлар ташу җәһәтеннән дә, гамәлгә ашыру бурычы тора”, - дип ассызыклады Илдар Халиков.

Татарстан Республикасында ике проект (Ауропа белән Кытайны тоташтыручы халыкара транспорт коридоры участогы төзелеше һәм Свияжски төбәкара мультимодаль логистика үзәге) транспорт-логистика комплексын үстерүдә комплекслы якын килү үрнәге булып тора. Идел буенда иң зурлардан саналган логистика үзәгенең беренче чиратын 2013 елда файдалануга тапшыру күздә тотыла.

ТР Премьер-министрының сүзләренә караганда, Татарстан Транспорт һәм юл хуҗалыгы министрлыгы эшчәнлегенең өстенлекле юнәлешләреннән берсе – авыл торак пунктларын каты өслекле юллар белән тоташтыру.

“2012 елда безнең алда зур бурычлар тора, аларны гамәлгә ашыру республика транспорт комплексын үстерү белән бергә, халыкара дәрәҗәдәге чаралар үткәрергә сәләтле ил буларак Россиянең статусын күтәрергә дә мөмкинлек бирәчәк. 2014 елгы Олимпия уеннары алдыннан Бөтендөнья җәйге универсиадасын үткәрү бәяләп бетергесез тәҗрибә булачак”, - дип ассызыклады Илдар Халиков.