Айнур Адельдинов журналистларга 50 иң яхшы инновацион идеягә конкурсындагы яңалыклар турында сөйләде

1 апрельдән “ТР өчен илле иң яхшы инновацияле идея” дигән VΙΙI республика бәйгесе старт алды. Конкурсны елдагыча ТР Инвестиция-венчур фонды ТР Фәннәр академиясе һәм Фәнни-техник өлкәдә кече формадагы предприятиеләр үсешенә ярдәм фонды белән берлектә оештыра. Бүген ТР Хөкүмәт йортында узган матбугат очрашуында конкурска заявкалар кабул ителә башлау турында игълан ителде. Очрашуда ТР Инвестиция-венчур фонды директоры Айнур Әйделдинов белән ТР Фәннәр академиясе президенты Әхмәт Мазһаров катнашты.

Конкурсның төп максаты – инновацияле эшчәнлекне стимуллаштыру. Быел да бәйге өч этапта һәм 8 номинация буенча узачак. Ә менә аның эчтәлегенә җитди үзгәреш кергән. Быел конкурска заявкалар идеянең республиканың яки Россиянең конкрет предприятиесендә гамәлгә кертү өчен кызыксыну табуын раслаучы документ белән бергә тәкъдим ителергә тиеш. Айнур Әйделдинов моны коммерциализацияләүгә дәгъва итүче заявкаларны сайлап алуны җиңеләйтер, дигән ышаныч белдерә.

“ТР өчен илле иң яхшы инновацияле идея” бәйгесенә тәкъдим ителүче заявкалар саны елдан-ел арта бара. 2005 елгы бәйгегә – 490 проект алынган булса, 2010 елда, мәсәлән, конкурста 1503 проект, ә узган ел 1659 проект катнашкан. ТР Фәннәр академиясе әлеге бәйгедә баш экспертиза оешмасы буларак чыгыш ясый. “Конкурска алынучы заявкалар саны арта баруга карамастан, кызганыч, тәкъдим ителүче проектларның сыйфаты еш кына аксый. Узган елларда конкурска алынган заявкаларны анализлау шуны күрсәтте”, - ди Әхмәт Мазһаров. Аның ассызыклавынча, заявкалар фән өлкәсендә куелган шартларга кайчак җавап бирми, эксперименталь тикшеренүдән башка тәкъдим ителә. “Проектларның сыйфаты өчен көрәшкә вакыт җитте”, - дип ул конкурсның таләпләрен катгыйландыруны шуның белән дә бәйләп аңлатты.

Айнур Әйделдинов хәбәрчебез белән булган әңгәмәсендә белдергәнчә, Фәннәр академиясе проектларны фәнни эзләнүнең ни дәрәҗәдә дөрес юлда булуыннан чыгып бәяләсе, Инвестиция-венчур фондының бурычы – аларга кешелек мөнәсәбәтләреннән, команда күзлегеннән чыгып бәя бирүдә. “Иң беренче чиратта, проектның уңышы аны гамәлгә ашырырлык яхшы команда булуда”, - дип ассызыклады ул.

Ә инде конкурска кабул ителә торган заявкаларга шартларны катгыйландыруга килгәндә ул, моны алга таба мөмкин булган финанс рискларыннан китү юлы дип санамый. “Компанияләр эреме, вакмы, эшчәнлегенең төрле этапларында рисклардан азат түгел. Бүгенге көндә мин иң зур риск дип команда рискын атар идем. Проблеманың зурысы башлангыч этапта килеп чыга. Әгәр компания шушы этаптан уңышлы гына узып китә икән, ул чакта бу компаниянең үсешенә өмет бар”, - ди фонд директоры.