Минтимер Шәймиев белән Илдар Халиков Болгарда төзелә торган объектларда булды

Бүген ТР Дәүләт киңәшчесе Минтимер Шәймиев белән ТР Премьер-министры Илдар Халиков борынгы Болгар шәһәренә эш сәфәре кылды. Алар “Яңарыш” республика проектын гамәлгә ашыру кысаларында төзелә һәм төзекләндерелә торган объектларны карады. Беренче Даши Намдакованың “Болгарны саклаучы” скульптурасын урнаштыру урынын карадылар. Элек сынны Истәлекле билге белән Җәмигъ мәчете арасында урнаштырылу хакында хәбәр ителгән иде, бу мөселманнар җәмгыяте вәкилләрендә канәгатьсезлек уятты.

Нәтиҗәдә скульптураны Елга вокзалы мәйданчыгында урнаштыру планлаштырылган иде. Бүген сынны урнаштыру буенча тагын бер урын каралды - Елга вокзалыннан 200 метр ераклыкта, мәчеттән ерактарак Идел буе. Әлегә урнаштыру урыны тәгаен билгеле түгел, дип ассызыклады Минтимер Шәймиев. “Болгарны саклаучы” скульптурасы ислам дине белән бәйле түгел. “Даши Намдаков борынгы төрки халыкларның гомуми мифологиясен генә сурәтләгән. Бу бернәрсә гә дә бәйле булмаган мөстәкыйль объект булачак”, - дип белдерде ул.
Аннары Болгар цивилизациясе музее белән Елга вокзалын карадылар. Хәзерге вакытта биредә эчке эшләр башкарыла. “Музейфикация эшенә керешү өчен барысы да тиз һәм сыйфатлы башкарылырга тиеш”, - диде М.Шәймиев.

Елга вокзалында вакытта мәгърифәтче һәм шагыйрь Кол Галигә скульптура кую мәсьәләсе каралды. М.Шәймиев фикеренә караганда, ул күренеп тора торган урында бинаның беренче катында урнаштырылырга тиеш. ТР Премьер-министры Илдар Халиков бу карарны хуплады. Шулай ук вокзал түшәменә җәю өчен төрле материаллар карадылар.

Аннары 922 елда Идел буе болгарлары рәсми рәвештә исламны кабул итүгә багышланган Истәлекле билге каралды. Аны 21 майга кадәр тапшыру ниятләнә.

Соңыннан рәсми затлар Икмәк музее янында төзелә торган Болгар мәчете комплексын һәм мәдрәсәне карады. Хәзерге вакытта анда бизәкләү эшләре бара. Объектны июньдә “Изге Болгар җыены” бәйрәменә ачарга планлаштыралар.

Шулай ук Икмәк музеен да карадылар. Ул Татарстанда игенчелек һәм икмәк җитештерү тарихы музее булачак. Музей төзелеше буенча төп эшләр төгәлләнгән, объектны музейфикацияләү эшләре бара, ул шулай ук майда тапшырылачак.

Аннары Ислам кабул ителүнең 1123 еллыгына багышланган тантаналы чарага әзерлек һәм үткәрү буенча оештыру комитетының күчмә утырышы узды.