ТР Президенты Люксембургның икътисад һәм тышкы сәүдә министры белән очрашты

Бүген Татарстан Республикасы Президенты Рөстәм Миңнеханов Люксембургның икътисад һәм тышкы сәүдә министры Этьен Шнайдер белән очрашты. Очрашу Рөстәм Миңнеханов җитәкчелегендәге Татарстан Республикасы делегациясенең Люксембургка эш сәфәре кысаларында узды.
ТР Президенты җылы кабул иткәне һәм Татарстан делегациясенә бай программа әзерләгән өчен Этьен Шнайдерга рәхмәт белдерде. “Без күп нәрсәләрне күрергә өлгердек, - диде ул. – Люксембург – бик матур ил, һәм шунысы аеруча мөһим – кешеләре ачык, алар хезмәттәшлек итү һәм алга таба мөнәсәбәтләрне үстерү белән кызыксына”.
Рөстәм Миңнехановның сүзләренә караганда, бүгенге көндә Татарстан һәм Люксембург эшкуарлары бер-берсен бик аз белә, әмма шунысы әһәмиятле - Татарстанның икътисади һәм инвестицион поенциалы хакында сөйләү мөмкинлеге барлыкка килде. Рөстәм Миңнеханов Татарстан-Люксембург түгәрәк өстәленең эшенә югары бәя бирде.
Люксембургның бизнес-даирәләренә бүгенге көндә Татарстан территориясендә Ауропада һәм бөтен дөньяда билгеле эре компанияләр эшләвен күрсәтергә кирәк, дип ассызыклады Рөстәм Миңнеханов. Бу, аерым алганда, «Бошунг Холдинг», «Мерседес Бенц», «Федерал Могул», «Кнорр Бремзе», «Роквул» һәм башка компанияләр. “Алабуга” махсус икътисади зонасында чит ил компанияләре белән берлектә күп санда инвестицион проектлар гамәлгә ашырыла, дип хәбәр итте ТР Президенты. Аның сүзләренә караганда, бүгенге көндә нефть чыгару һәм нефть эшкәртү, нефть химиясе, машина төзелеше һәм башка тармаклар Татарстан икътисады өчен төп тармаклардан санала.
Татарстан белән Люксембург арасындагы мөнәсәбәтләрне алга таба үстерү өчен Люксембург компанияләрен уртак проектлар булдыру өчен җәлеп итәргә кирәк, диде Рөстәм Миңнеханов. Татарстан Россия территориясендә Люксембург предприятиеләре бизнесын оештыру өчен яхшы мәйданчык була алыр иде, дип ассызыклады ул.
ТР Президенты уртак проектларның икътисадның барлык өлкәләрендә дә булдырылу мөмкинлегенә ышаныч белдерде. Ул Люксембург бизнес-делегациясенең Татарстанга визитын оештырырга тәкъдим итте. “Без сезнең өчен уңайлы вакытта үзебезнең икътисади потенциалны тәкъдим итәргә, республикада гамәлгә ашырыла торган проектлар хакында сөйләргә әзер”, - диде Рөстәм Миңнеханов.
Үз чиратында, Люксембургның икътисад һәм тышкы сәүдә министры Этьен Шнайдер Татарстан делегациясен сәламләвенә шат икәнлеген белдерде. “Сез Россиянең икътисади яктан нык үскән бер төбәген җитәклисез, - диде ул. – Безгә ике якка да файдалы проектларны табарга кирәк”.
Этьен Шнайдер Рөстәм Миңнехановның Люксембург бизнес-делегациясе вәкилләренең Татарстанга визитын оештыру тәкъдимен хуплады. Ул 2012 елның ноябрендә Люксембург бизнес-делегациясе вәкилләренең Россиягә визиты оештырылуы хакында хәбәр итте, әлеге визит кысаларында Татарстанга да сәфәр кылу мөмкинлеге туарга мөмкин, диде ул.
Моннан, һичшиксез, файдаланырга кирәк, диде Рөстәм Миңнеханов.
Этьен Шнайдер кыскача гына Люксембургның икътисады һәм хәзерге халәте хакында сөйләде. Аның сүзләренә караганда, инвестицияләр җәлеп итми торып ил бу дәрәҗәдә уңышлы үсеш кичерә алмас иде. Икътисад һәм тышкы сәүдә министрының сүзләренә караганда, бүгенге көндә банк секторы, ИТ-өлкә, логистика, шулай ук экология өлкәсе Люксембургның төп үсеш юнәлешләреннән санала.
Соңыннан Этьен Шнайдер, Рөстәм Миңнеханов һәм Татарстан делегациясе әгъзалары истәлеккә фотога төште.
Люксембургның икътисад һәм тышкы сәүдә министры Этьен Шнайдер белән очрашуда Россия Федерациясенең Люксембургтагы Гадәттән тыш һәм Тулы вәкаләтле илчесе Александр Шульгин, Люксембургның Россиядәге Гадәттән тыш һәм Тулы вәкаләтле илчесе Пьер Ферринг, Тышкы элемтәләр департаменты директоры – ТР Президентының халыкара мәсьәләләр буенча ярдәмчесе Искәндәр Мөфлиханов һәм башкалар катнашты.