Рөстәм Миңнеханов республика “Ветераннар йорты”н төзүгә багышланган киңәшмә уздырды

Казанда республика “Ветераннар йорты”н төзү мәсьәләсе бүген ТР Президенты Рөстәм Миңнеханов үткәргән киңәшмәдә күтәрелде. Күчмә киңәшмә РОСТО (ДОСААФ) бинасында узды. “Ветераннар йорты”н нәкъ менә аның мәйданнарына урнаштыру күздә тотыла.Проект хакында фикер алышуларда ТР Премьер-министрының беренче урынбасары Равил Моратов, ТР Президентының социаль мәсьәләләр буенча ярдәмчесе Татьяна Ларионова, төзелеш, архитектура һәм торак-коммуналь хуҗалык министры Ирек Фәйзуллин, ТР сугыш һәм хәрби хезмәт ветераннары иҗтимагый оешмасы рәисе Әхәт Юлашев һ.б. катнашты.

РОСТО бинасының һәр катының мәйданы 1280 кв метр тәшкил итә. Бинаның беренче катындагы мәйданнар бүген өлешчә эшмәкәрләргә арендага бирелә. Рөстәм Миңнеханов бинаның беренче һәм икенче катларында булып, РОСТО (ДОСААФ)ның хәрби хезмәткә чакырылу яшендәге егетләрне хәрби-учет белгечлекләренә өйрәтү буенча эшчәнлеге белән танышты. Шулай ук автомобильләргә техник хезмәт күрсәтү буенча лаборатор-гамәли дәресләр узган сыйныфларны карады.

“Ветераннар йорты”н төзү проектын бинаның беренче һәм икенче катларында гамәлгә ашыру ниятенә килгәндә, Президент беренче чиратта, бинаның бүгенге хәлен, инженерлык коммуникацияләренең, тәрәзә конструкцияләренең торышын тикшерү кирәк, дигән фикердә. Татарстан башлыгы шулай ук бинаның йөзен заманча итеп үзгәртү өчен, фасадны төзекләндерү, җылыту тәкъдимен кертте.

Президент Премьер-министрның беренче урынбасары Равил Моратовка РОСТО (ДОСАААФ) бинасында урнашкан автомобиль йөртүчеләр әзерләү мәктәбен күчерү өчен кулай бина эзләү бурычын йөкләде. Ул һөнәри-техник училищеларның берсендә урнашырга мөмкин.

Республика “Ветераннар йорты” проекты кысаларында РОСТО бинасында яшьләрнең иҗтиагый оешмалары, кафе, ветераннар өчен чәчтарашханә, юридик һәм нотариаль консультацияләр үзәкләре һ.б. урнашачак.