“Эйдос” компаниясе җитәкчелеге Татарстанда “Медицина-биология технопаркы” проектын гамәлгә ашыру теләген белдерде

“Эйдос” компаниясе җитәкчелеге Татарстанда “Медицина-биология технопаркы” проектын гамәлгә ашыру теләген белдерә. Алар бу хакта бүген ТР Хөкүмәт йортында Татарстан Президенты Рөстәм Миңнеханов белән очрашуда җиткерде.

“Эйдос” җәмгыяте генераль директоры Рамил Гайнетдинов башта компания һәм аның Россия базарындагы инновацион эшчәнлеге белән таныштырып үтте. Аннан аңлашылганча, базарда инде өч елдан артык билгеле булган“ Эйдос” җиһазлар һәм тренажер-симуляторлар җитештерү буенча махсуслашкан компания. Эшчәнлеге төп дүрт юнәлештә – автотренажерлар, Гражданнар оборонасы һәм гадәттән тыш хәлләр министрлыгы өчен тренажерлар, махсуслаштырылган роботлар һәм медицина симуляторлары җитештерү буенча алып барыла. Соңгы юнәлеш белән әле узган елдан бирле генә шөгыльләнәләр. Бүген “Эйдос-медицина” проекты “Сколково”ның эксперт коллегиясен узып, аның резиденты булган. Медицина симуляторлары планлы хирургиядә операцияләргә репетицияләр уздыру мөмкинлеген тудыра, табиб хаталарын булдырмаска ярдәм итә.

Компаниянең генераль директоры Рамил Гайнетдинов бүгенге очрашу вакытында Татарстан территориясендә “Медицина-биология технопаркы” проектын реализацияләү тәкъдиме белән чыкты. Югары медицина технологияләре белем бирү үзәге, Россиянең һәм чит илләрнең медицина, инновацияле компанияләре аның потенциаль резидентлары буларак карала. 20 мең кв. метр мәйданда шулай ук инновацияле проектлар инкубаторын, конференцияләр залын, белегечләр өчен кунакханә, медицина вузлары вәкиллекләрен урнаштыру ниятләнә. Мондый технопарк төзүнең төп идеясе медицинаны алга таба үстерү, чит ил аналогларын үзебезнең эшләнмәләр белән алмаштыру, ил медицинасының дәрәҗәсен күтәрү белән бәйле. Әлеге инвестиция проектын гамәлгә ашыру өчен ышанычлы партнер эзлибез, дип искәртте Рамил Гайнетдинов.

ТР Президенты Рөстәм Миңнеханов, үз чиратында, республиканың әлеге проект белән җентекләп танышырга теләвен җиткереп, алга таба кирәкле ярдәм күрсәтергә әзер булуын белдерде. “Бу, чыннан да, бик кызыклы идея. Бүген республикада алдынгы мәгълүмат технологияләре үсешенә зур игътибар бирелә”, - дип ассызыклады ул. Президент Татарстанда югары технологияле медицина үзәкләренең уңышлы эшләп килүенә басым ясады. Рөстәм Миңнеханов ТР мәгълүматлаштыру һәм элемтә министры Николай Никифоров белән төзелеш, архитектура һәм торак-коммуналь хуҗалык министры Ирек Фәйзуллинга проект белән җентекләп танышып чыгуны, технопаркны республика териториясендә урнаштыру вариантларын карауныйөкләде. Президент әлеге проектның федераль үзәк тарафыннан хупланып, шәхси-дәүләт партнерлыгында финанс ярдәме алу мөмкинлеген дә кире какмады.