Алексей Песошин “Казаноргсинтез” заводында яңа мичләрне эшләтеп җибәрүдә катнашты
Бүген “Казаноргсинтез” ГАҖ этилен заводының Э-200 комплексында дүрт яңа пиролиз мичләрен эшләтеп җибәрү тантанасы узды. Бу чарада Татарстан Премьер-министры Алексей Песошин, “ТАИФ” ААҖ генераль директоры Альберт Шиһабетдинов, “Казаноргсинтез” ГАҖ генераль директоры Фәрит Миңнегулов, Казан мэры Илсур Метшин катнашты.
Яңа җайланмаларны гамәлгә кертү предприятиегә нигез салуга 60 ел һәм беренче продукция эшләп чыгаруга 55 ел тулуга багышланган.
Дүрт яңа пиролиз мичләре 40 елдан артык эшләгән ун иске мичне алыштырачак. Мич блогын яңарту производствоның нәтиҗәлелеген арттыруга ярдәм итәчәк.
“Соңгы 15 елда “Казаноргсинтез” заводында “ТАИФ” ярдәме белән төп җитештерүче көчләр 70%ка яңартылган. 2017 елда гына да капиталь төзелеш объектларын һәм җиһазлар яңартуны финанслауга якынча 8 млрд сум бирелгән”, - дип ассызыклады ТР Премьер-министры.
Алексей Песошин сүзләренчә, быел “Казаноргсинтез” заводында яңартуның яңа этабы башланган, ул өч елга исәпләнгән. Бу программа кысаларында 10 млрд сумнан артык инвестицияләү планлаштырыла.
Яңа мичләр төзү 2017 елның маеннан 2018 елның ноябренә кадәр дәвам иткән.