Рөстәм Миңнеханов: "Безне Латвия белән хезмәттәшлек итү кызыксындыра"

Татарстан компанияләре өчен транспорт һәм финанслар өлкәсендә Латвия белән хезмәттәшлек гаять кызыклы булыр иде. Бүген Казан Кремлендә Латвиянең РФ дәге Гадәттән тыш һәм Тулы вәкаләтле илчесе Эдгарс Скуя белән очрашуда Татарстан Президенты Рөстәм Миңнеханов шулай дип белдерде.

Республика башлыгы очрашуны ачып, илчегә Латвиянең эшлекле даирәсе делегациясе белән Татарстанга сәфәре өчен рәхмәт белдерде. Рөстәм Миңнеханов ике республика арасындагы мөнәсәбәтләрнең бүгенге торышы һәм стратегик үсеш планы хакында фикер алышуга канәгать булуын җиткерде.

Рөстәм Миңнеханов Татарстан белән Латвия арасында сәүдә әйләнеше динамикасының уңай булуына, шул ук вакытта анда Латвия товарларының өлеше бик кечкенә булуга, аны үстерү кирәклегенә игътибар юнәлтте. Татарстанда предприятиеләр төзү мөмкинлеген каравыгызны, аларның, аерым алганда, махсус икътисади зона, технопарклар, индустриаль парклар кебек мәйданнарда урнашуын теләр иде”, - ди ТР Президенты.

Эдгарс Скуя, үз чиратында, Россия белән Латвия арасында мөнәсәбәтләр үсешен искәртеп, Татарстан белән мөнәсәбәтләрнең үзләре өчен приоритет саналуын хәбәр итте. Бүгенге очрашуда Латвия делегациясе әгъзалары Татарстан җитәкчелегенә банк өлкәсендә хезмәттәшлек тәкъдиме белән чыкты. Моннан тыш, Латвия Татарстан товарларын үзенең диңгез портлары аша үткәрүдә транзит хезмәтләре күрсәтүгә әзерлеген белдерә. Латвия ягы әлеге максатларны күздә тотып Түбән Новгород-Рига контейнер поездының маршрутын Казанга кадәр озайтып булыр иде, дип саный.

Хезмәттәшлекнең тәкъдим ителгән әлеге вариантлары ТР Президентында кызыксыну уятты. Ул Латвия банкирларына әлеге сәфәр барышында Татарстандагы коллегалары белән очрашырга тәкъдим итте. Президент Латвиянең транспорт мөмкинлекләрен “Татанефтехиминвест-холдинг” ның Директорлар советы утырышында аерым презентацияләргә кирәк дип саный. Республика башлыгы Латвия портлары белән танышу, аларның конкурентлык өстенлеген өйрәнү һәм Латвия эшмәкәрләре белән эшлекле элемтәләрне җайга салу өчен, Татарстан предприятиеләре җитәкчеләре белән берлектә шәхсән бирегә сәфәр кылу ниятен дә җиткерде.