Татарстанда 2012 елга билгеләнгән капиталь ремонт программасы 40%ка үтәлгән

Татарстанда капиталь ремонт программасына кергән барлык йортларда эшләр башланган. Узган ике атна дәвамында 17 объектта эшкә керешкән. Моның турында бүген ТР Министрлар кабинетында ТР Президенты Рөстәм Миннеханов һәм ТР Премьер-министры Илдар Халиков катнашында үткән киңәшмәдә ТР Төзелеш, архитектура һәм торак-коммуналь хуҗалык министры Ирек Фәйзуллин хәбәр итте.

Аның сүзләренә караганда, 10 майга кадәр 1 миллиард 603 миллион сумлык эш башкарылган, бу еллык лимитның 37 процентын тәшкил итә. Апас муниципаль районы бүлеп бирелгән лимитны тулысынча үзләштергән.

Барлык чыганаклардан капиталь ремонт программасына каралган 1 миллиард 762 миллион сум акча күчерелгән. Бу еллык лимитның 40 проценты. Бер төркем районнар торак-коммуналь хуҗалык фондыннан идарә итә торган компанияләр һәм торак милекчеләре ширкәте счетына акчаларны күчермәгән. Моңа бәйле ТР Төзелеш министрлыгы башлыгы муниципаль берәмлекләрнең җитәкчәләреннән әлеге мәсьәләне күзәтү астына алуларын сорады.

Фатирларга индивидуаль җылылык кертүгә килгәндә, Ирек Фәйзуллин 2012 елда 354 күпфатирлы һәм 231 шәхси йортларны аерым җылытуга күчерү планлаштырыла, дип хәбәр итте (барлыгы 5 мең 39 фатир). 15 сентябрьдә тәмамланырга тиешле эшләр расланган җитештерү графигы нигезендә алып барыла. Объектларда 17 подряд оешмалары җәлеп ителгән. Кирәкле материаллар һәм җиһазлар сатып алынган. 11 майга проект-смета документациясе 2 мең 775 фатирга эшләнгән, фасад газ үткәрү юлларын төзү буенча монтаж эшләре 2 мең 416 фатирда башкарылган, фатир эчендәге газ үткәрү юллары һәм җиһазлар 1 мең 959 фатирда монтажланган, ә җылыту, салкын һәм кайнар су системалары белән тәэмин итү – 138 фатирда.

Киңәшмәне тәмамлаганда Рөстәм Миннеханов йортларны, шулай ук мәктәпләрне капиталь ремонтлау, ике контурлы казаннарны урнаштыру, “Чиста су” програмасы буенча эшләрне җәй дәвамында тәмамларга кирәклеген ассызыклады.