Рөстәм Миңнеханов Казанда English First мәктәбен ачты

Белем бирү өлкәсендә дөнья лидеры булган EF English First Казанда беренче халыкара белем бирү үзәген ачты. Бүген мәктәпнең рәсми ачылышы ТР Президенты Рөстәм Миңнеханов катнашында узды. Ачылыш тантанасына шулай ук мәгариф һәм фән министры Альберт Гыйльметдинов, Казан мэры Илсур Метшин килгән иде.

1965 елда нигез салынган EF компаниясе белем бирү программаларының киң спектрын тәкъдим итүче буларак мәгълүм. Бүгенге көндә компаниянең дөньяның 60 илендә 4000 нән артык мәктәбе эшли. EF компаниясе Россиядә тел программалары буенча Сочи Олимпиадасы һәм Казан Универсиадасының партнеры булып та санала.

Компания Россиядә 1993 елдан билгеле. Аның МВА, кыска вакытлы программалар, университетка әзерләү, бакалавриат, магистратура, чит илләрдәге тел курсларын тәкъдим итүче EF English First бүлекчәсе аеруча популяр. Бүгенге көндә Татарстанда EF English First компаниясе белән берлектә берничә уңышлы проект гамәлгә ашырыла. Шундый эре проектларның берсе – “Татарстан өчен инглиз теле” программасы.

EF English First берничә ел элек инглиз теле укытучыларының белемнәрен күтәрү һәм дәүләт хезмәткәрләренә инглиз телен өйрәтү буенча Татарстан белән хезмәттәшлекне башлап җибәргән иде. Узган ел ул килешү нигезендә Татарстанда позицияләрен ныгытуга алынды. Татарстанда мәктәбен ачу шуның белән бәйле.

Инглиз телен белү дәрәҗәсен күтәрү һәм киртәләрсез тел тирәлеге булдыру республика өчен бүген стратегик әһәмияттәге бурыч санала. EF English First мәктәбе тәкъдим итә торган масштаблы белем бирү программалары халыкны иң заманча инновацияле тел программалары белән таныштыра, чит телләрне үзләштерү өчен уңайлы тирәлек булдыра.

Әлеге интеллектуаль белем бирү мәктәбенең ачылышында ТР Президенты Рөстәм Миңнеханов республика алдындагы бурычларның, менталитетның үзгәрүенә игътибар юнәлтте. “Боларның барысы да Казанның Универсиаданы уздыру хокукыннан яулавыннан башланды. Шул вакытта без бүгенге халыкара таләпләргә туры килмәвебезне аңладык”, -ди ул. Аның сүзләренә караганда, проблемаларның берсе халыкара аралашу телен белү дәрәҗәсенә бәйле булган. “Мәсьәләне чишү өчен, Универсиадага чит илләрдән волонтерлар җәлеп итү варианты да каралды. Шушы компанияне бик вакытлы таптык, ул республикага тел өйрәтү буенча кирәкле программа продуктын эшләде”, - дип ассызыклады президент. Рөстәм Миңнеханов инглиз телен камилләштерүне инглиз теле укытучыларыннан башлауларын, аларның зур уңышларга ирешүен, белем дәрәҗәсенең 5,5 пунктка күтәрелүен ассызыклады. Президент белдергәнчә, халыкара аралашу телен үзләштерүче дәүләт хезмәткәрләрендә уңыш әле алай ук зур түгел. “Республиканың һәр җитәкчесе анык итеп инглиз телендә аңлаша белергә тиеш”, -дип тагын бер кат искәртте ул. Республика башлыгы бүген Казанда ачкан инновацияле бу мәктәпкә Татарстан халыкна инглиз телен нәтиҗәле итеп өйрәтүдә зур өметләр баглануын белдерде. Мондый өйрәтү үзәкләре күп булырга тиеш, дигән фикердә ул.

Рөстәм Миңнеханов әлеге компаниянең инглиз телен интерактив юл белән өйрәтү буенча гына түгел, татар телен шул юл белән өйрәтү программаларын эшләүдә дә Татарстанның стратегик партнеры булачагын ассызыклады. Ул онлайн-режимында инглиз телен өйрәтү тәҗрибәсе нигезендә, татар теле буенча тиздән программа эшләнәчәген хәбәр итте.

EF компаниясенең бизнес һәм дәүләт оешмаларына тел чишелешләрен тәкъдим итү буенча Россия һәм БДБ илләрендәге генераль директоры Эдуард Балдаков Татарстан белән берлектә берничә унышлы проект гамәлгә ашырылуын искәртеп, республикада урта мәктәпләрдәге 3000 нән артык инглиз теле укытучысының квалификация күтәрү курслары узуын җиткерде. “Татарстан ирешелгәннәр белән генә туктап калмый. Хәзер без Мәгариф һәм фән министрлыгы белән бергә яңа проект эшләтеп җибәрәбез”, -дип хәбәр итте ул. Әлеге проект онлайн-укыту йомгаклары буенча иң яхшы нәтиҗәләр биргән 300 инглиз теле укытучысын EFның Кембридж һәм Бостондагы халыкара тел үзәкләренә квалификация күтәрү курсларына җибәрүне күздә тота. Биредә иң абруйлы халыкара сертификатларга ия булачак. “Шул рәвешле, Татарстанда инглиз теле буенча иң югары квалификацияле мөгаллимнәр составы формалаша. Ул Татарстанда телне өйрәтү буенча халыкара экспертиза үзәге төзергә ярдәм итәчәк”, - ди ул.

Агымдагы ел башында EF English First “Казан-2013” Башкарма дирекциясе белән хезмәттәшлек килешүен дә имзалады. Аның нигезендә, компания дирекция хезмәткәрләренең инглиз телен камилләштерүгә йөкләмә ала.

EF English Firstның Россиядәге директоры Карл Кронстедт хәбәрчебезгә белдергәнчә, компаниянең Казандагы инновацион мәктәбенә тел өйрәнергә теләгән һәркем килә ала. Дөрес, моның өчен аңа 16 яшь тулган булуы шарт. Тел өйрәтү программасы 16 дәрәҗәне эченә ала. Моңарчы әлеге телне белмәүчеләр нуленче дәрәҗәдән башлап өйрәнә. Бер дәрәҗәне үзләштерү өчен якынча 2 ай вакыт таләп ителә. Һәр дәрәҗәне уңышлы үзләштергәннән соң, сертификатлар тапшырылачак. Бер дәрәҗәне үзләштерү уку планы компонентына бәйле рәвештә аена 4 мең сумнан 5 мең сумга кадәр тора. Инглиз телен өйрәтү системасы төп 4 компонентны эченә ала. Аның берсе - телне Интернет аша онлайн-программалар ярдәмендә өйрәнү, икенчесе - тел күнекмәләрен укытучы ярдәмендә үстерү, өченчесе - алган белемнәрне билгеле бер реаль вазгыять шартларында практикада куллану күнекмәләре алу, дүртенчесе - төрле тестлар узу. Уку планы һәр кешенең теләгеннән, максатларыннан чыгып, кулай вариантта төзелә. Бүгенге көндә мондый тел мәктәпләренә мөрәҗәгать итүчеләрнең күпчелеген хезмәт урынында тагын да югарырак баскычка омтылучылар, зуррак хезмәт хакын алырга теләүчеләр һәм сәяхәт итәргә яратучылар тәшкил итә. Дәресләрне укытучыдан аерым алырга да, төркемнәрдә шөгыльләнергә дә мөмкин. Уку планының зур өлеше мультимедияле дәресләргә бирелә.

Әлеге халыкара белем бирү үзәгендә семинарлар һәм лекцияләр өчен аудиторияләр, ярым шәхси якын килеп дәресләр алу өчен класслар, интерактив тематик дәресләр уздыру өчен бүлмәләр, онлайн-мәктәптә мөстәкыйль шөгыльләнү өчен зона булдырылган.