Татарстанда капиталь ремонт программасын 10 сентябрьгә тәмамларга планлаштырыла

Татарстанда 2012 елда күпфатирлы торак йортларга капиталь ремонт ясау программасы 63 процентка үтәлгән. Бу хакта бүген ТР Хөкүмәте Йортында республика Премьер-министры Илдар Халиков алып барган киңәшмәдә әйтелде.
ТР Министрлар кабинетының Төзелеш, транспорт, торак-коммуналь һәм юл хуҗалыгы идарәсе башлыгы Илдар Сибгәтуллин хәбәр иткәнчә, 7 июньгә барлык чыганаклардан идарә компанияләр һәм торак милекчеләре ширкәте хисабына 2 миллиард 61 миллион сум акча күчерелгән, бу еллык лимитның 47 процентын тәшкил итә. Дәүләт торак инспекциясе мәгълүматлары буенча, 8 июньгә гомуми 2 миллиард 725 миллион сумлык эш башкарылган, бу ел лимитының 63 процентын тәшкил итә. Республиканың Апас, Питрәч һәм Теләче муниципаль районнары бүлеп бирелгән лимитны тулысынча үзләштерделәр.
Ләкин, шул ук вакытта Дәүләт торак инспекциясе 1 миллиард сумга гына башкарылган эшләр турында актлар кабул итте. Илдар Сибгатуллин подряд оешмаларына аванс буларак акчаларның 30 проценты гына бирелүен, алга таба финанслау өчен башкарылган эшләр турында актлар тапшырырга кирәклеген искәртте.
Республиканың төзелеш, архитектура һәм торак-коммуналь хуҗалыгы министры Ирек Фәйзуллин капиталь ремонт ясау программасы график нигезендә дәвам итүен хәбәр итте. “Һәм эш динамикасы 2011 елгы динамиканы узып китте, - дип белдерде ТР Төзелеш министрлыгы башлыгы. – Узган елдагы кебек үк, төп программаны 10 сентябрьгә кадәр тәмамлау өчен, барлык муниципалитетлардан да бу темпны саклауларын сорыйм”.