Россия Президенты Владимир Путин Алексей Песошинны Мактау ордены белән бүләкләде
Россия Президенты Владимир Путин Татарстан Республикасы Премьер-министры Алексей Песошинны Мактау ордены белән бүләкләде. Югары бүләк “хезмәттә ирешелгән уңышлары һәм күпьеллык намуслы эше өчен” бирелде. Бу турыда указ хокукый мәгълүмат порталында чыкты.
Дәүләт бүләкләренә тагын биш татарстанлы лаек булды. Казан мэры Илсур Метшин шәһәрнең социаль-икътисади үсешенә зур өлеш керткәне өчен III дәрәҗә “Ватан алдындагы хезмәте өчен” орденын алды.
В. Д.Шашин исемендәге “Татнефть” ГАҖ генераль директорының беренче урынбасары - баш инженеры Наил Ибраһимов Мактау ордены белән бүләкләнде. “Татнефть” ГАҖнең тагын ике хезмәткәре Александр Иванов һәм Рашат Солтановка “РФ нефть һәм газ сәнәгатенең атказанган хезмәткәре” дигән мактаулы исем бирелде.
Шулай ук КФУның “Н. И.Лобачевский исемендәге лицее”ның гомуми белем бирү мәктәп-интернаты укытучысы Сергей Михайлин “Россиянең атказанган укытучысы” исеменә лаек булды.