Рөстәм Миңнеханов ТР район башлыклары белән ашыгыч киңәшмә үткәрде

Җитәкчелек һәм хокук саклау органнары тарафыннан Татарстанда экстремизм үсешенә йогынты ясаучы затларга карата иң катгый чаралар күреләчәк. Бу хакта бүген ТР Президенты Рөстәм Миңнеханов республика муниципаль берәмлекләре башлыклары белән видеоконференция режимында узган киңәшмәдә белдерде.
Рөстәм Миңнеханов муниципалитет җитәкчеләренә мөрәҗәгатендә Татарстанда экстремизм бетереләчәк дип ассызыклады. Ул исламның радикаль агымнарын хуплап вәзгыятьне катлауландыручыларга карата иң катгый чаралар күрергә вәгъдә итте. “Татарстан һәрвакыт традицион ислам динен үстерде һәм киләчәктә дә шулай булачак”, - дип белдерде ТР Президенты.
Республика башлыгы үз территорияләрендә экстремизмга юл куючы муниципалитет җитәкчеләренә җәза вәгъдә итте. “Без гел кисәтеп килдек, иң катгый чаралар күреләчәк дип вәгъдә итәм”, - дип мөрәҗәгать итте Рөстәм Миңнеханов район башлыкларына. Россия Президенты Владимир Путин Казандагы һәлакәтне шәхсән шәрехләде, аның боерыгы буенча Татарстанга аның Идел буе федераль округында Тулы вәкаләтле вәкиле Михаил Бабич килде.
“Тыныч үсеш алучы Татарстанда террорлыкны үстерүгә шартлар тудырырга беркем дә мөмкинлек бирмәячәк”, - дип вәгъдә итте Михаил Бабич.
РФ Президентының Идел буе федераль округындагы Тулы вәкаләтле вәкиле Михаил Бабич муниципалитет җитәкчеләренә, дини оешмалар һәм хокук саклау органнары җитәкчеләренә урыннарда вәзгыятьне анализларга һәм экстремизмны бетерү өчен чаралар кабул итәргә чакырды. “Әгәр үз мөмкинлекләрегез җитмәвен тойсагыз, республика җитәкчелегенә, хокук саклау органнарына мөрәҗәгать итегез”, - диде Михаил Бабич.
“Йә без хәзер бу куркынычны юкка чыгарабыз, йә ул башка киңлекләрне билиячәк”, - дип ассызыклады М.Бабич.