Митрополит Анастасий: «Православие вәкилләре Татарстан җирендә тынычлык өчен дога кылачак”

Республиканың православие вәкилләре Татарстан җирендә ТР мөселманнары Диния нәзарәте җитәкчеләренә карата кичәге җинаятьне кылучылар бозарга теләүче тынычлыкны саклауны сорап дога кылачак. Бу хакта Рус православие чиркәвенең Татарстан митрополиясе җитәкчесе, Казан һәм Татарстан митрополиты Анастасий Татарстан Республикасы Президенты Рөстәм Миңнеханов белән очрашу ахырында белдерде.

“Кичә мин Мәскәүдә бу хәбәрне ишетеп шаккаттым. – Казанда булган хәлләр акылга сыймый, чөнки мондый нәрсә булырга тиеш түгел иде. Күп еллар дәвамында православие һәм ислам дине вәкилләре тыныч яшәгән шәһәрдә Вәлиулла хәзрәт үтерелә һәм мөфтигә һөҗүм ясала”.

“Әлбәттә, православие вәкилләре дә кайгы кичерә һәм хәзер дә мөфтинең тизрәк саләмәтләнүен, гасырлар буена җыелган тотрыклылык саклануын сорап дога кылалар”, - диде Анастасий.

“Изге Рамазан ае, мөселманнар ураза тотып гөнаһларыннан арыну алдыннан шундый фаҗигале хәл булуы кызганыч. Шәһәрдә кичә булган каршылыклардан безне Аллаһ саклар дип ышанабыз, - диде митрополит. – Без, православие вәкилләре, иртәгә Изге Анакай Казан иконасы пәйда булуын бәйрәм итәбез һәм Татарстан җиренә тынычлык алып килүен сорап дога кылабыз”.

“Мондый җинаять кылучылар җирдә үк үзләрен гомерлек газап чигәргә этәрә. Кичә кылынган террорлык акты кайвакыт безнең аллага мәхәббәт югалтуны искәртеп тора. Киләчәктә безнең белән андый хәл булырга язмасын”, - дип теләде митрополит Анастасий.