EF Education First компаниясе республика белгечләре ярдәмендә “ТатарТаун” он-лайн мәктәбе проектын эшләячәк

EF Education First компаниясе республиканың татар теле белгечләре ярдәмендә “ТатарТаун” он-лайн мәктәбе проектын эшләячәк. ТР Президенты Рөстәм Миңнехановның бүген EF Education First компаниясе җитәкчелеге белән очрашуында шул хакта сүз барды.
ТР Хөкүмәте йортында узган очрашуда компаниянең техник директоры, укытуның интерактив системасын эшләүче Энио Омайя, EF Corporate Language Learning Solutions компаниясе президенты Кристоф Уилферт һ.б. катнашты.
Кунакларны сәламләгән Рөстәм Миңнеханов Татарстан белән EF Education First компаниясе арасында партнерлык мөнәсәбәтләре урнашуына, инде кайбер казанышларга ирешелүенә басым ясады. Компания 2013 елда Казанда узачак җәйге Универсиаданың партнеры булды, бу хакта июль аенда Килешү имзаланды. Ә май аенда Казанда EF ның мәгариф үзәге ишекләрен ачты. Республиканың 3,4 меңнән артык укытучысы EF ның укыту үзәкләрендә инглиз теле буенча белем дәрәҗәләрен һәм сыйфатын күтәрү мөмкинлеген алды. Казан шәһәре мэриясе дә EF белән хезмәттәшлек хакында Килешү имзалады.
ТР Президенты хәбәр итүенчә, якын арада ТР Сәламәтлек саклау министрлыгы (1 меңгә якын кеше) линиясе буенча белгечләргә инглиз телен өйрәтү буенча Килешүгә кул куелачак. EF Education First компаниясенең Татарстан белгечләрен җәлеп итеп эшләячәк тагын бер проекты татар телен өйрәнү буенча“ТатарТаун” дип аталган он-лайн мәктәп булачак. Әлеге проектны эшләүдә “ИнглишТаун” өлге булып торачак. Рөстәм Миңнеханов искәртүенчә, бүген татарларның 30 проценты гына республикада яши, калганнары башка төбәкләрдә, дөньяның төрле илләрендә гомер кичерә. “Без татар телен сакларга телибез, он-лайн мәктәп теләге булган барлык кешегә татар телен өйрәнүдә ярдәмгә киләчәк”, - ди ул.
Президент республика мөгаллимнәренең август киңәшмәсе кысаларында татар телен өйрәтү буенча он-лайн мәктәп проекты буенча EF компаниясе белән хезмәттәшлек Килешүен имзаларга тәкъдим итте. Быел август киңәшмәсе 18 августта Мамадышта узар дип көтелә.
Бүгенге очрашуда яклар шулай ук Татарстан министрларына ике атналык программа буенча инглиз телен өйрәтү мөмкинлеге хакында да фикерләште.