Владимир Путин ТР мөфтие Илдус Фәизовка һәм Вәлиулла Якуповның хатынына бүләк тапшырды

Бүген Россия Президенты Владимир Путин Татарстанга сәфәре кысаларында Болгарда булды. Аны ТР Президенты Рөстәм Миңнеханов, РФ Президентының Идел буе федераль округындагы тулы вәкаләтле вәкиле Михаил Бабич, республика Дәүләт киңәшчесе Минтимер Шәймиев озатып йөрде.

Дәүләт башлыгы Болгар дәүләт тарих-архитектура музей-тыюлыгының төп объектларында, аерым алганда, Болгар шәһәрчегендә, Ак мәчеттә, Истәлекле билгедә булды. Владимир Путинны Болгар музей-тыюлыгы территориясендә алып барыла торган археология казу эшләре барышы белән дә таныштырдылар.

Ак мәчетне караганнан соң Татарстанның дин вәкилләренә дәүләт бүләкләре тапшыру тантанасы булды. ТР мөселманнары Диния нәзарәтенең уку бүлеге җитәкчесе Вәлиулла Якупов гражданлык бурычын башкарганда күрсәткән батырлыгы өчен үлгәннән соң "Батырлык өчен"ордены белән бүләкләнде.

Владимир Путин бүләкне Вәлиулла хәзрәтнең хатыны Галина Авентьевага тапшырды. РФ Президенты республика мөфтие Илдус хәзрәт Фәизовка “Рухи-әхлакый традицияләрне үстерүдә, гражданнар дуслыгын һәм конфессиара хезмәттәшлекне ныгытуда хезмәт куюы өчен ”Дуслык" ордены тапшырды.

“Безнең эшчәнлекне югары бәяләвегез өчен рәхмәт. Татарстан мөселманнары һәм ТР мөселманнары Диния нәзарәте өчен гадәти булмаган вакытта безнең белән бергә булуыгыз бик мөһим. Традицион ислам динен тотучылар өчен тотрыклылыкны саклау төп максат булып тора”, диде Илдус хәзрәт бүләкне алгач.

Владимир Путин үз чиратында, республиканың традицион конфессия эшлеклеләренә рәхмәт белдерде. “Халыкка хезмәт итү авыр. Ачыкланганча, ул әле куркыныч та. Сезнең кебек көчле рухлы кешеләрне сындыру мөмкин түгеллеген беләм. Халыкка һәм уртак Ватаныбызга хезмәт итүегез өчен рәхмәт сезгә”, - диде РФ Президенты.