Татарстан Президенты Россия Фәннәр академиясе әгъзасы Рәшит Сүнәев белән очрашты

Бүген Казанда Татарстан Президенты Рөстәм Миңнеханов Россия Фәннәр академиясе әгъзасы, Татарстан Республикасы Фәннәр академиясенең дәрәҗәле әгъзасы Рәшит Сүнәев белән очрашты. ТР Хөкүмәт йортында узган очрашуда шулай ук ТР Фәннәр академиясе президенты Әхмәт Мазгаров, ТР Министрлар Кабинеты Аппаратының югары, урта һөнәри белем бирү һәм фән бүлеге җитәкчесе Ренат Заманов, ТР Фәннәр академиясе академигы Наил Сахибуллин катнашты.

Казанда Россиянең танылган галиме Рәшит Сүнәев бүген Татарстан башкаласында старт алган “Рентгеновское небо: от звезд и черных дыр до космологии” дип аталган халыкара конференциядә катнаша. Форум 7 сентябрьгә кадәр дәвам итә. Конференцияне ТР Фәннәр академиясе, КФУның астрономия һәм космик геодезия кафедрасы, Россия Фәннәр академиясенең Космик тикшеренүләр институты, Германиянең Макс Планк исемендәге Астрофизика институты оештыра. Конференциянең баш инициаторы - Рәшит Сүнәев.

Конференциядә Россия, АКШ, Германия һәм башка илләрнең танылган астрофизиклары катнаша.

Бүгенге очрашуда Рөстәм Миңнеханов Рәшит Сүнәевка конференцияне үткәрү урыны буларак Казанны сайлавы өчен рәхмәт белдерде. Алар Татарстанда һәм Россиядә фәнни тикшеренүләрне үстерү мәсьәләләре буенча фикерләште.