Рөстәм Миңнеханов Казан халыкара мөселман киносы фестивале кунаклары белән очрашты

Казан халыкара мөселман киносы фестивале бурычы – традицион исламның тынычлык сөя торган асылын күрсәтү. Шундый фикерне бүген ТР Президенты Рөстәм Миңнеханов VIII фестиваль кунаклары белән очрашу барышында әйтте. Казан Кремлендә булган очрашуда ТР Президенты Аппараты җитәкчесенең беренче урынбасары Марат Моратов, ТР мәдәният министры Айрат Сибагәтуллин катнашты. Очрашу фестиваль ачылышы алдыннан булды.

Рөстәм Миңнеханов очрашуны ачканда эшләре өчен фестиваль оештыручыларына һәм кунакларга рәхмәтен белдерде. “Без сигезенче тапкыр бу фестивальне уздырабыз, аның соралуын күрәбез, - дип белдерде ТР Президенты. – Заманча дөньяда ислам турында бик күп фикерләр бар, һәм фестиваль аның тынычлык сөя торган асылын күрсәтә”.

ТР башлыгы сүзләренчә, елдан-ел фестиваль масштаблары үсә. Быел фестивальдә катнашырга 55 илдән 450 дән артык кино дәгъва кылды.

Фестиваль президенты – Россия мөфтиләре Советы рәисе Равил Гәйнетдин, Казанда мөселман киносы фестивален уздыру мөмкинлеге өчен, Рөстәм Миңнехановка рәхмәтен белдерде. Аның сүзләренчә, фестиваль яшь буынны тәрбияләүнең бер чарасы булып тора.

Төркия Республикасының мәдәният һәм туризм министры урынбасары Фарук Шахин министрлык башлыгы исеменнән ТР Президентына сәламләү сүзен тапшырды.

Фестиваль кунагы режиссер Егор Кончаловский, коммерция әйләнешенә дәгъва кылмаслык нәфис фильмнарны киң экраннарда күрсәтү мөмкинлеге өчен, оештыручыларга рәхмәт әйтте.

Очрашу соңында Рөстәм Миңнеханов фестиваль алдында торган бурычның тормышка ашачагына өметен белдерде. “Кешеләр тынычлыкта һәм аңлашуда яшәсеннәр өчен, аларга бер-берсе турында яхшылыкны белергә кирәк, һәм мондый фестивальләр ислам диненең үзенчәлеген күрсәтергә мөмкинлек бирәләр”, - дип саный ТР Президенты.