Рөстәм Миңнеханов Росгидромет башлыгы белән очрашты

Бүген ТР Президенты Рөстәм Миңнеханов Гидрометеорология һәм әйләнә-тирә мохитне күзәтү федераль хезмәте җитәкчесе Александр Фролов һәм Бөтендөнья метеорология оешмасы генераль секретаре Мишель Жарро белән очрашты. ТР Хөкүмәт Йортындагы очрашуда шулай ук республика экология һәм табигый ресурслар министры Артем Сидоров, ТР Президентының икътисади мәсьәләләр буенча ярдәмчесе Айрат Хәйруллин, ТР буенча Гидрометеорология һәм әйләнә-тирә мохитне күзәтү идарәсе җитәкчесе Сергей Захаров катнашты.

Александр Фролов һәм Мишель Жарро Казанда Гидрометеорология һәм әйләнә-тирә мохитне күзәтүнең төбәк мәсьәләләре буенча халыкара конференциядә катнашалар.

Бүген очрашу барышында А.Фролов Казан университетының гидрометеорология өлкәсендә зур уңышларын билгеләде һәм алга таба да КФУ бу юнәлеш лидерларының берсе булып калуында өметен белдерде.

ТР буенча Гидрометеорология һәм әйләнә-тирә мохитне күзәтү идарәсе җитәкчесе Сергей Захаров Рөстәм Миңнехановка Татарстан идарәсенең эшчәнлеге турында хәбәр итте. Аның сүзләренчә, федераль үзәкнең ярдәме белән идарәдә һава торышын фаразлау сыйфатын яхшыртырга ярдәм итә торган техника алына.