ТР Президенты ИКОМОС экспертлары белән очрашты

Бүген ТР Президенты Рөстәм Миңнеханов Һәйкәлләр һәм истәлекле урыннарны саклау буенча Халыкара совет (ИКОМОС), ЮНЕСКО Бөтендөнья мирасы комитеты консультатив органы экспертлары Виши Золт һәм Гергели Надь белән очрашты. ТР Хөкүмәт Йортындагы очрашуда шулай ук ТР Дәүләт Киңәшчесе Минтимер Шәймиев, республика мәдәният министры Айрат Сибагәтуллин, ТР Президентының социаль мәсьәләләр буенча ярдәмчесе Татьяна Ларионова катнашты.

Сәфәрләренең максаты - Болгар һәм Зөя шәһәрләре белән әлеге тарихи һәйкәлләрне ЮНЕСКО Бөтендөнья мирасы исемлегенә кертү буенча башланган эш кысаларында танышу. ИКОМОС вәкилләре инде бу тарихи урыннарда булдылар һәм Казан Кремлендә киңәшмә уздырдылар.

Бүгенге очрашу барышында ТР Президенты Рөстәм Миңнеханов билгеләвенчә, республикага алдынгы халыкара экспертларның килүе әһәмиятле вакыйга булып тора. “Безнең үз тарихыбыз, истәлекле урынннарыбыз бар. Казан Кремле инде ЮНЕСКО Бөтендөнья мирасы исемлегенә кертелгән”, - дип искәртте Р.Миңнеханов. Республика башлыгы сүзләренчә, Кремльдә реставрация ясалган Благовещенск соборы һәм торгызылган Кол Шәриф мәчете янәшә тора, бу - Татарстанда төрле диннәрнең тыныч яшәве символы.

Рөстәм Миңнеханов ИКОМОС вәкилләренең Татарстанга килүе Болгарның һәм Зөянең ЮНЕСКО Бөтендөнья мирасы исемлегенә кертелүенә ярдәм итәр дигән ышанычын белдерде.