Татарстап Президенты DSM компаниясе башлыгы белән очрашты

Бүген ТР Президенты Рөстәм Миңнеханов белән Голландиянең DSM компаниясе генераль директоры һәм идарә рәисе Фейке Сибесманың Хөкүмәт йортында үткән очрашуында хезмәттәшлек перспективалары һәм уртак проектларны гамәлгә ашыру мөмкинлекләре каралды.

Очрашуда ТР Премьер-министры урынбасары – авыл хуҗалыгы һәм азык-төлек министры Марат Әхмәтов, РФ Дәүләт Думасының сәнәгать комитеты рәисе урынбасары Ирек Богуславский, “Челтәр компаниясе” ААҖ генераль диреткоры Илшат Фәрдиев, “Агросила групп” ЯАҖ генераль директоры Илдар Гыймадиев, DSM компаниясенең Россия/БДБ буенча президенты Владимир Бонгард һ.б. катнашты.

Билгеле булганча, узган елның июнендә DSM компаниясенең Чаллыда терлекчелек өчен югары сыйфатлы витаминлы азык катнашмалары җитештерү буенча заводы ачылган иде. Бүгенге очрашуда Фейке Сибесма үз вакытында компаниягә Татарстанга инвестицияләр салырга тәкъдим иткән Илшат Фәрдиевка рәхмәт сүзләрен җиткерде. “Ул безне башлангыч инвестицияләр белән генә тукталып калмаска, инвестицияләр салуны дәвам итәргә чакыра”, - ди Сибесма.

DSM җитәкчесе компанияне презентацияләп, ТР Президентына бергәләп Татарстанда гамәлгә ашыру мөмкинлеге булган перспектив проектлар хакында сөйләде. Аның сүзләренә караганда, компания төрле өлкәләрдә эшләү буенча зур тәҗрибә туплаган. DSM терлек азыгы катнашмалары җитештерү буенча дөньяда иң эре компания булудан тыш, туклану продуктлары, фармацевтика продукциясен дә җитештерә, биотехнологияләр үсешенә, аерым алганда, биоягулык җитештерүгә зур игътибар бирелә. Компания моннан тыш, югары температурага чыдамлы пластмасса, техник җепселләр, композит сумалалар һ.б. төрдәге нефть химиясе продукциясен җитештерә. Сибесма әлеге өлкәләрдә Татарстан белән хезмәттәшлек кызыксындыруын җиткерде.

“Без тормыш, материаллар турындагы фәннәр үсеше, инновацияләрне тормышка ашыру белән шөгыльләнүче эре компания. Ике яклы хезмәттәшлекне үстерү өчен мөмкинлекләр күп”, - дип искәртте кунак.

Аның сүзләренә караганда, 2013 ел Россия белән Голландия дуслыгы елы дип игълан ителгән. Сибесма сөйләшү барышында Россиягә сәфәре һәм ТР Президенты белән очрашу өчен, Нидерландлар королевасының рәсми кичке ашка чакыруыннан баш тартуын да яшермәде. Компания башлыгы сүзләренә караганда, аның бу карары монархта аңлау тапкан, ул татарстанлыларга Голландия исеменнән сәлам тапшырган. “Сезнең белән очрашу минем өчен гаять әһәмиятле, бу мөмкинлекне югары бәялим”, - диде кунак.

Рөстәм Миңнеханов Фейке Сибесмага җылы сүзләре өчен рәхмәт белдерде. Аның сүзләренә караганда, DSM компаниясе Татарстанда үзен яхшы яктан гына күрсәткән. “Кыска вакыт эчендә заманча завод төзелде, ул безнең горурлыгыбыз. Бу сезнең республикада ясаган беренче адымыгыз. Бизнесыгызның өлкәсе киңкырлы”, - дип ассызыклады ТР Президенты. Аның сүзләренә караганда, Голландия компаниясе белән хезмәттәшлек “Алабуга” МИЗы территориясендә производстволарны үстерү, төрле материаллар һәм компонентларга сорау арту белән бәйле рәвештә аеруча кызыксыну уята. Татарстан башлыгы “КАМАЗ”, республиканың машина төзелеше буенча башка предприятиеләре белән хезмәттәшлекне, композит материаллар җитештерү, ашлык эшкәртү һ.б. проектларны гамәлгә ашыруны перспектив юнәлешләр дип саный.

Рөстәм Миңнеханов хезмәттәшлекнең мөмкин булган барлык аспектларын өйрәнү өчен эшче төркемнәр төзергә тәкъдим итте.