Рөстәм Миңнеханов Төркия Җөмһүриятенә килеп җитте

Бүген ТР Президенты Рөстәм Миңнеханов эшлекле сәфәр белән Төркия Республикасына килеп җитте. Аны Бурса провинциясенең "Енишеһир" халыкара аэропортында провинция губернаторы Шахабеттин Харпут каршылады. Шулай ук Татарстан делегациясе составында – ТР сәнәгать һәм сәүдә министры Равил Зарипов, ТР Президентының халыкара мәсьәләләр буенча ярдәмчесе Радик Гыйматдинов, ТР Инвестицион үсеш агентлыгы җитәкчесе Линар Якупов, ТР Сәүдә-сәнәгать палатасы рәисе Шамил Агеев, Татарстаннан бизнесменнар.

Рөстәм Миңнеханов ике көнлек эшлекле сәфәр кысаларында Бурса провинциясенең сәнәгать предприятиеләрендә булачак, шулай ук автомобиль төзелеше һәм автокомпонент җитештерү өлкәсендә хезмәттәшлек буенча Татарстан – Төркия эшлекле форумында катнашачак. Делегация составына кергән ТР бизнесменнары эшлекле очрашулар уздырачак, анда ТР һәм Төркия компанияләре арасында хезмәттәшлек мәсьәләләре турында сөйләшү планлаштырыла.