Рөстәм Миңнеханов: “Dow Chemical компаниясе белән хезмәттәшлекнең яңа юнәлешләрен билгеләү мөһим”

Бүген ТР Президенты Рөстәм Миңнехановның Dow Chemical (АКШ) компаниясе вәкилләре белән очрашуында мөмкин булган уртак проектлар турында сүз барды. Очрашу ТР Хөкүмәт Йортында үтте, анда ТР Президенты ярдәмчесе Ринат Сабиров, “Татнефтехиминвест-холдинг” ААҖ генераль директоры Рафинат Яруллин, “ТАИФ” ААҖ генераль директоры Альберт Шиһабетдинов, шулай ук республиканың эре нефть химиясе предприятиеләре вәкилләре катнашты.

Кунакларны сәламләп, Рөстәм Миңнеханов инде ТРның Dow Chemical компаниясе белән нефть химиясе өлкәсендәге юнәлешләрдә хезмәттәшлек итүен, һәм бүген алга барырга теләк булуын искәртте. Республика башлыгы шулай ук Dow Chemical “Казаньоргсинтез” ААҖ белән тыгыз мөнәсәбәттә торуын билгеләде. Тулаем алганда, Рөстәм Миңнеханов ТРның нефть чыгару һәм нефть химиясе кебек тармакларны үсеш ноктасы итеп билгеләвен әйтте, моннан тыш, республика илдә пластмасс, каучук һ.б. эре җитештерүчеләрнең берсе булып торуын билгеләде. “Алга таба полимерларны җитештерүне үстерү өчен, без потенциаль инвесторларны җәлеп итү яклы, - дип билгеләде ТР Президенты. – Шул исәптән, автокомпонентларны җитештерү өчен дә”.

“Сезнең ТРга сәфәрегез кысаларында багланышлар буенча алдагы планнарны, уртак проектлар булдыруны сөйләшергә кирәк”, - дип белдерде Рөстәм Миңнеханов, Dow Chemical вәкилләренә мөрәҗәгать итеп.

Аның сүзләренчә, “Алабуга” МИЗ территориясендә “ХК Композит” ЯАҖ җитештерүе Татарстан һәм Dow Chemical уртак проектларын тормышка ашыру өчен кыр булып тора.

Алга таба Рөстәм Миңнеханов ТРда Горбунов исемендәге КАПОда композит материалларны җитештерү буенча завод булачагын искәртте.

Dow Chemical вәкилләре Татарстан белән хезмәттәшлек итүдә кызыксынуларын белдерделәр, инвестицияләр өчен мөмкинлекләрне өйрәнүләрен, ТР Инвестицион үсеш агентлыгы белән тыгыз хезмәттәшлек итүләрен хәбәр иттеләр. Dow Chemical дәүләт органнары белән эшләү департаменты директоры һәм композицион материаллар бүлекчәсе җитәкчесе Дуглас Паркс Төркиягә сәфәрдән соң, компаниянең бу мәсьәләләрне каравын хәбәр итте.

Россиядә һәм БДБдә Dow Chemical генераль директоры Оксана Пилатова очрашуда катнашучыларны компаниянең үсеш этаплары һәм планнары белән кыскача таныштырды. Dow Chemical 1897 нче елда АКШ, Мичиган штатында нигез салынган. Бүген компания төрле тармаклар өчен 5 меңнән артык продукция эшләп чыгара. Компаниянең дөньяның 36 илендә 197 заводы бар, анда 52 мең кеше эшли, заказ ясаучылар – 160 илдә. 2011 нче елда компаниянең әйләнеше 56 миллиард АКШ доллары булган. Компания Россиядә 40 елдан артык билгеле, бүген Россия территориясендә ике завод эшли (Раменское һәм Владимир шәһәрләрендә). 2011 нче елда Россиядә компания әйләнеше 770 миллион АКШ доллары тәшкил иткән.

Dow Chemical дәүләт органнары белән эшләү департаменты директоры һәм композицион материаллар бүлекчәсе җитәкчесе Дуглас Паркс Төркия партнерлары белән уртак предприятиеләр – DowAKSA турында тулырак сөйләде. Ул шулай ук “Алабуга” МИЗы территориясендә булганлыгын һәм алга таба МИЗ һәм анда урнашкан җитештерү урыннарының мөмкинлекләрен өйрәнергә ниятләвен билгеләп үтте.

Очрашуга нәтиҗәләр ясап, Рөстәм Миңнеханов хезмәттәшлекнең яңа юнәлешләрен билгеләүнең мөһимлеген белдерде.