ТР Президенты халыкара конференциядә катнашучылар белән очрашты

Бүген ТР Президенты Рөстәм Миңнеханов “Тикшерү, модификация һәм төрле физик табигать материалларын алуның плазмалы технологияләре” (“Плазменные технологии исследования, модификации и получения материалов различной физической природы”) халыкара фәнни конференция катнашучылары белән очрашты. Очрашуда Россия фәннәр академиясе вәкил-хәбәрчесе Юрий Михайлов, Калифорния университеты профессоры Альфред Вонг, КМТТУ ректоры Герман Дьяконов, ТР Президентының икътисади мәсьәләләр буенча ярдәмчесе Айрат Хәйруллин, ТР мәгариф һәм фән министры Энгель Фәттахов, ТР Фәннәр академиясе президенты Әхмәт Мәзһәров катнашты.

“Тикшерү, модификация һәм төрле физик табигать материалларын алуның плазмалы технологияләре” халыкара фәнни конференциясе һәм “Яңа материалларны тикшерү һәм алуда плазмалы технологияләр” яшь галимнәр һәм белгечләрнең халыкара фәнни мәктәбе Казанда 16-18 нче октябрьда үтә. Конференцияне оештыручылар – Россия фәннәр академиясе, РФ Мәгариф һәм фән министрлыгы, Россия фундаменталь тикшеренүләр фонды, ТР Фәннәр академиясе, ТР Мәгариф һәм фән министрлыгы, Казан милли тикшеренү технология университеты.

Конференциядә плазмалы технологияләр куллануда соңгы елларда ирешелгән иң әһәмиятле нәтиҗәләр каралачак. Шулай ук конференция кысаларында тиешле җиһазлар, приборлар, продукция күргәзмәсе оештырылган.

Бүген очрашуда галимнәр Рөстәм Миңнехановка быелгы конференция программасы турында сөйләделәр һәм чараны уздырырга ярдәм иткән өчен, республика җитәкчелегенә рәхмәт белдерделәр. Шулай ук яклар икътисадның төрле тармакларында яңа материалларны куллану перспективалары турында сөйләштеләр.