Минтимер Шәймиев Калев Сепп белән очрашты

Бүген Казан Кремлендә ТР Дәүләт Киңәшчесе, “Яңарыш” Республика Фонды Попечительләр советы Рәисе Минтимер Шәймиев Халыкара Табигатьне Саклау Берлегенең (МСОП) табигый мирасны саклау буенча эксперты һәм консультанты Калев Сеппны кабул итте.

Калев Сепп – Эстония Социаль фәннәр, табигый-мәдәни ландшафт һәм табигый мирас белән идарә итү университеты профессоры, “Экология һәм табигатьне файдалану” факультеты деканы. Аның ТРга сәфәре Болгар һәм Зөяне Юнеско Бөтендөнья мирасы исемлегенә кертү буенча башланган эш кысаларында оештырылган.

Калев Сепп игътибары үзәгендә - Зөя утрау-шәһәрчеге, чөнки ул ЮНЕСКО Бөтендөнья мирасы Комитетына тарихи-мәдәни генә түгел, ә ландшафтлы комплекс буларак та игълан ителгән. Шуңа күрә Зөяне ЮНЕСКО исемлегенә керткәнче, Комитет (МСОП) эксперты нәтиҗәсен алырга тиеш. Бу атна дәвамында Калев Сепп утрау-шәһәрчекнең уникаль табигатен өйрәнәчәк.

Очрашу вакытында Минтимер Шәймиев Калев Сеппка Болгар һәм Зөя тарихы, “Яңарыш” Республика Фонды, “Татарстан мәдәни мирасы: борынгы Болгар шәһәре һәм Зөя урау-шәһәрчеге” проекты турында сөйләде.

МСОП экспертын Зөя урау-шәһәрчегенең табигый мирас объекты буларак та игълан ителүе кызыксындырды.

Минтимер Шәймиев сүзләренчә, Зөя тарихи-архитектура һәм табигый-ландшафтлы комплекс – танылган ландшафт феномены. Зөя ансамбле Куйбышев сусаклагычы утраулары агачлары һәм Идел, Зөя елгалары ярлары белән гармониядә тора.

ТР Дәүләт Киңәшчесе фикеренчә, Зөянең ЮНЕСКО карамагына күчүе фәнни-техник прогресс шартларында аның табигый үзенчәлеген саклап калырга ярдәм итәчәк.

ТР өчен Болгар һәм Зөянең – мөселман һәм православие диннәре урыннарының ЮНЕСКО Бөтендөнья мирасы исемлегенә бер үк вакытта керүләре мөһим. Ләкин, ЮНЕСКО кагыйдәләре буенча, ике объектны “тарихи-мәдәни комплекс” номинациясе буенча тәкъдим итү мөмкин түгел. Шуңа күрә галимнәрнең тәкъдиме белән Зөя өчен “тарихи-мәдәни һәм ландшафтлы комплекс” номинациясе сайланды. ЮНЕСКО исемлегенә керткән очракта бу - РФ территориясендә ЮНЕСКОның тарихи-мәдәни һәм ландшафтлы объекты булачак.

Очрашуда ТР Президенты ярдәмчесе, “Яңарыш” Республика Фонды башкарма директоры Татьяна Ларионова һәм “Идел-Кама дәүләт тыюлыгы” директоры Юрий Горшков катнашты.

Иртәгә Калев Сепп Зөя утрау-шәһәрчеген тикшерә башлый, шулай ук Болгар музей-тыюлыгында булачак.