Рөстәм Миңнеханов Карнеги Меллон Университеты вәкилләре белән ИТ-университет булдыру проекты турында сөйләште

Бүген ТР Президенты Рөстәм Миңнеханов Карнеги Меллон Университеты (Питтсбург, АКШ) вәкилләре белән “Иннополис” инновацион шәһәр-иярчене базасында ИТ-университет булдыру проекты турында сөйләште. Очрашу ТР Хөкүмәт Йортында үтте, анда ТР Премьер-министр урынбасары – ТР мәгълүматлаштыру һәм элемтә министры Роман Шәйхетдинов, ТР мәгариф һәм фән министры Энгель Фәттахов, ТР Президенты ярдәмчесе Радик Гыйматдинов катнашты.

Карнеги Меллон Университетын хәйрия мәсьәләләре буенча Директор Майкл Штайнер, iCarnegie информацион технологияләр буенча Директор Майкл Хеми, “Иннополис” ИТ-университеты административ директоры Дмитрий Кондратьев тәкъдим итте.

Кунакларны сәламләп, Рөстәм Миңнеханов Питтсбургка ТР делегациясе сәфәрен һәм Карнеги Меллон Университеты белән таныштыруны яхшы оештырганнары өчен, рәхмәтен белдерде.

“Бүген безгә Карнеги Меллон Университеты һәм аның iCarnegie-ИТ-бүлеге белгечләре катнашында ИТ-университетны булдыру проекты өстендә эшләү мәсьәләләре турында сөйләшергә кирәк”, - диде ТР Президенты.

Ул шулай ук ИТ-университет төзелеше проекты РФ Хөкүмәте тарафыннан хупланылуын да искәртте. Рөстәм Миңнеханов сүзләренчә, “Иннополис” махсус икътисад зонасы статусын алыр, дип фаразлана, һәм Карнеги Меллон Университеты бу зонаның төп предприятиесенә әйләнәчәк.

“Иннополис” ИТ-университеты административ директоры Дмитрий Кондратьев Рөстәм Миңнехановны кыскача хәзерге вакытта Карнеги Меллон Университеты партнерлары нәрсә белән шөгыльләнүләрен сөйләде.

Университет белгечләре Рөстәм Миңнехановтан проектны киләчәктә ничек күрүе, ИТ-университет ТР икътисадына нинди өстенлекләр бирәчәге һ.б. турында кызыксындылар. Шулай ук алар Казанда КФУ каршында ИТ-лицей ачылышын уңай бәяләделәр.

Рөстәм Миңнеханов ИТ-университет Россиянең техник вузы булачагын белдерде. ИТ-университет проектын федераль проект буларак, позициягә күтәрергә кирәк, диде ул.

“Сезнең дисциплинара фәннәрне укыту тәҗрибәсен файдаланырга кирәк, бүген бу - аеруча актуаль”, - диде Рөстәм Миңнеханов, Университет вәкилләренә мөрәҗәгать итеп.

Рөстәм Миңнеханов фикеренчә, ИТ-университет нинди форматта булса да, киләсе уку елыннан эшли башларга тиеш.