Рөстәм Миңнеханов Әлки районында яңа авыл юлын карады

Бүген ТР Президенты Рөстәм Миңнеханов республиканың Әлки районына эшлекле сәфәре кысаларында Карамалы авылына таба җәелгән яңа асфальт юлны карады. Карамалы авылына кадәр асфальт юл быел җәелгән – моңа кадәр 208 кеше яшәгән торак пунктка кадәр каты катламлы юл җәелмәгән булган. Подрядчы "Алексеевскдорстрой" трассадан авылга кадәр 5 км юлдан тыш, үз акчаларына торак пунктның эчендә тагын бер километр асфальт юл салган. Төзелеш эшләренең гомуми бәясе 107 миллион сум тәшкил иткән.

Бүген Рөстәм Миңнеханов яңа юлдан үтте, соңыннан авыл халкы блән аралашты. Карамалылар башкарган эшләр өчен, төзүчеләргә, ә авыл юллары төзелеше программасы өчен, республика башлыгына рәхмәтен белдерделәр.

ТР Президенты авыл өчен юлларның әһәмиятле булуын ассызыклады. Аның сүзләренчә, асфальт юл балаларны мәктәпкә йөртергә, ә авыл халкына авылдан читкә йөрергә мөмкинлек бирәчәк.

Рөстәм Миңнеханов авыл халкы белән әңгәмәсендә ТР җитәкчелегенең алга таба да авылга ярдәм итәргә ниятләвен раслады. ТР Президенты билгеләвенчә, моның өчен республикада бер төркем программалар тормышка ашырыла һәм авыл клублары, ФАПлар, авыл юллары төзелеше, мәктәпләргә капиталь ремонт ясау, шулай ук торак пунктларны эчәргә яраклы чиста су белән тәэмин итү буенча эшләр дәвам ителәчәк.