Алексей Песошин катнашында Татарстан территориясендә газ белән тәэмин итү өлкәсендә көйләү эшчәнлеген гамәлгә ашыру шартлары турында килешү имзаланды
Бүген Казанда Татарстан территориясендә газ белән тәэмин итү өлкәсендә көйләү эшчәнлеген гамәлгә ашыру шартлары турында килешү имзаланды.
Имзалау ТР Хөкүмәте йортында узды. Анда Татарстан Премьер-министры Алексей Песошин катнашты.
Документ Татарстан Республикасының социаль-икътисади үсешен тәэмин итү, газны билгеләү һәм газны куллану челтәрләренең нәтиҗәле эшен һәм үсешен, сәнәгать кулланучыларын табигый газ белән тәэмин итү күләмен арттыру максатында имзаланды.
Килешү кысаларында “Газотранспортная компания”ҖЧҖ Чулман аша уза торган 29,55 км озынлыктагы югары басымлы газүткәргечне файдалануга тапшырачак. Ул Алабуга шәһәренең 2нче газ билгеләү станциясеннән Түбән Кама сәнәгать узелы объектлары аша узачак.
Документны статс-секретарь - Россия Монополиягә каршы федераль хезмәт җитәкчесе урынбасары Андрей Цариковский, Татарстан Премьер-министры урынбасары - Татарстан сәнәгать һәм сәүдә министры Альберт Кәримов, “Газпром межрегионгаз Казань” АҖ генераль директоры Ринат Сабиров, “Газотранспортная компания” ҖЧҖ генераль директоры Валерий Сазанов имзалады.