Илдар Халиков: “Алабуганың торак-коммуналь хуҗалыгы өлкәсендәге тәҗрибәсен республиканың барлык шәһәрләрендә дә кулланырга кирәк”

Бүген ТР Премьер-министры Илдар Халиков Алабуга муниципаль район Советының XXIII сессиясендә катнашты. Анда 2012 елда районның социаль-икътисади үсешенә нәтиҗә ясалды һәм 2013 елга бурычлар билгеләнде. Сессия беренче тапкыр җирле телевидениедә туры эфирда трансляцияләнде.
2012 елда Алабуга районында сәнәгать җитештерүе 115,6 процент тәшкил иткән. Кеше башына туры килә торган инвестицияләр күләме буенча район республикада 3 урынны били. Эшсезлек проблемасы хәл ителә, хәзер эшсезләр саны 1,81 процент.

Район авыл хуҗалыгы күрсәткечләрен дә күтәрә: ит һәм сөт җитештерү арткан.
Торак тапшыру планы 101,3 процентка үтәлгән, 66,8 мең кв. метр торак файдалануга тапшырылган. 2012 елда 85 Бөек Ватан сугышы ветераны, ятимнәр, Чернобыль афәтендә катнашучылар торак шартларын яхшырткан. Күп балалы гаиләләргә җир кишәрлеге бирү программасы гамәлгә ашырыла.
30 ел чамасы элек төзелгән мәктәпләрне ремонтлау программасы кысаларында Морт һәм Иске Юраш авылларында ике гомумбелем бирү мәктәбе ремонтланган. Таңай авылында 140 укучыга исәпләнгән яңа мәктәп төзелеше башланган.
Хәзер укучылар куркынычсызлыгы беренче планга чыга. Һәр мәктәптә “Мәктәп тәрәзәсе” системасын кертү планлаштырыла. Һәр мәгариф учреждениесендә турникет һәм электрон контроль системасын урнаштыру уртача 280 мең сумга төшәчәк.
Алабуга районы башлыгы Геннадий Емельянов торак-коммуналь хуҗалык өлкәсен кискен проблемага ия дип белдерде. Ул коммуналь инфраструктура тузган, көн саен авария проблемасы белән очрашабыз, дип белдерде.
“Торак-коммуналь хуҗалыгы – Алабуганың иң проблемалы өлкәсе. Хәзер башкарыла торган эшләр бер көнлек түгел, чөнки бу проблема бер елда гына түгел, ә ун елларча тупланган. Торак-коммуналь хуҗалыкны модернизацияләү өлкәсендә Алабугалылар тәҗрибәсен республиканың башка шәһәрләрендә дә кертергә кирәк дип саныйм”, - диде Илдар Халиков.
“Алабуга” МИЗ күрсәткечләре – районның уңышлы үсешенең нигезе булып тора.. Бүген биредә 6 предприятие-резидент эшли, 2,5 мең эш урыны бар. 2015 елда резидент компанияләр саны 60, ә эшчеләр саны 8,5 меңгә җитәчәк. Шуңа күрә шәһәр һәм социаль инфраструктураны, шулай ук торак базарын үстерергә кирәк. Алабуга арендага торак бирү республика программасын гамәлгә ашыручы Татарстан шәһәрләре өчлегенә керде.

“Алабугага һәрвакыт бик теләп киләм, ул үзенчәлекле шәһәр, монда игелекле кешеләр яши. Биредә гореф-гадәтләр сакланган, алардан башка шәһәр бүгенге үсешкә ирешә алмас иде”, - диде Илдар Халиков. Ул Алабугалыларның сәламәтлек саклау, мәгариф, авыл хуҗалыгы өлкәләрендә уңышларын билгеләп үтте һәм Республика Хөкүмәте белән бергә хәл ителергә тиешле бурычларны билгеләде.