ТР Авыл хуҗалыгы һәм азык-төлек министрлыгы: Цифрлы системалар Татарстанның сөт җитештерүче 129 хуҗалыгында кулланыла
Республиканы сөт терлекчелегендә цифрлаштыруның нәтиҗәлелеге турында ТР хөкүмәте йортында узган киңәшмәдә ТР Премьер-министры урынбасары - ТР авыл хуҗалыгы һәм азык-төлек министры Марат Җәббаров җиткерде.
Киңәшмәне барлык муниципаль районнар белән видеоконференэлемтә режимында ТР Премьер-министры Алексей Песошин уздырды.
Министр хәбәр иткәнчә, бүгенге көнгә цифрлы системалар 129 хуҗалыкта кулланыла, аларда 140 мең сыер исәпләнә. Бу хуҗалыкларда 70% сөт җитештерелә. Сөт сатудан кергән өстәмә табыш 1 млрд сум тәшкил иткән.
Терлекчелектә заманча алымнарны популярлаштыру өчен агымдагы елның апрель һәм сентябрь айларында 10 зональ семинар-киңәшмәләр уздырылды.
Аларда сөт терлекчелеген цифрлаштыру мәсьәләләре каралды. Районнарның алдынгы тәҗрибәләре тәкъдим ителде. Әтнә районында 100% хуҗалык программалы продуктлар белән эшли. Саба районында 75% хуҗалыкта цифрлы программалар кулланыла.
Марат Җәббаров хәбәр иткәнчә, хәзерге вакытта республика хуҗалыкларында 100 робот-сыер савучы һәм 150 югары җитештерүчәнле сыер саву заллары эшли, анда 91 мең сыер исәпләнә яисә савым сыер көтүенең 44%ы.