Алексей Песошин «Теләче» сәнәгать паркында булды, Теләче муниципаль районы Советының хисап утырышында катнашты

Бүген Татарстан Республикасы Премьер-министры Алексей Песошин Теләче муниципаль районында берничә объектта булды.

Эш сәфәренең төп максаты – Теләче муниципаль районы Советының хисап утырышында катнашу.

Алексей Песошин «Теләче» сәнәгать паркы предприятиеләре эше белән танышты, сыекландырылган табигый газ заводы төзелеше урынында булды, анда аңа проект төзелеше этаплары тәкъдир ителде.

Хисап сессиясе башланганчы Алексей Песошин һәм Теләче муниципаль районы башлыгы Нәҗип Хаҗипов җирле җитештерүчеләр продукциясе белән таныштылар – күргәзмә район мәдәният йорты фойесында оештырылган иде.

Теләче муниципаль районы башлыгы Нәҗип Хаҗипов хисап докладында агымдагы вәзгыять, социаль-икътисадый үсеш күрсәткечләре, проблемалар һәм перспективалар турында сөйләде.

Татарстан Премьер-министры утырыш барышында хәбәр иткәнчә, бүген ул уңышлы эшләп килүче «Теләче» сәнәгать мәйданчыгы – паркы белән танышты. «Моннан тыш, без табигый газны сыекландыру комплексы төзелешенең барышы белән таныштык, - диде ул. - Без бу юнәлештә эшне дәвам итәргә тиеш. - Районда мондый проектларның булуы – бик мөһим. Яңа производстволарны ачу яңа эш урыннары булдырырга, гражданнарның керем дәрәҗәсен күтәрергә, муниципалитетның икътисадын һәм салым базасын ныгытырга мөмкинлек бирә».

Халыкка социаль ярдәм чаралары турында сөйләгәндә, Алексей Песошин хәбәр иткәнчә, узган ел республикада бу максатларга 23 млрд. сумга якын акча бүлеп бирелгән, һәр икенче сум балалы гаиләләргә ярдәм итүгә юнәлдерелгән, балалы гаиләләргә Пенсия фонды аша 6,5 млрд. сум акча бирелгән.

Шул исәптән Теләче районында яшәүчеләр 68,9 млн. сумлык социаль ярдәм чаралары алганнар, шуларның 68,8 млн. сумы – Пенсия фонды хисабына.

«Гражданнарның төп керем чыганагы – хезмәт хакы. Һәм без аның лаеклы дәрәҗәсен тәэмин итәргә тиеш. Татарстан хезмәт хакы дәрәҗәсе буенча Идел буе федераль округы төбәкләре арасында 2 нче урында тора, - дип искәртте Татарстан Республикасы Премьер-министры. - Татарстанда уртача айлык хезмәт хакы 43 394,5 сум тәшкил итте (2021 елның 11 ае нәтиҗәләре буенча). Теләче районында уртача хезмәт хакы – 29,8 мең сум. Бу күрсәткеч буенча сез республика шәһәрләре һәм районнары арасында 44 нче урында гына. Район хакимиятенә эш бирүчеләр белән эшне көчәйтергә, хезмәткәрләрнең хезмәт хакын арттыруны, районда бер генә кешене дә, бигрәк тә күп балалы гаиләләрне дә игътибарсыз калдырмыйча, ярлылык дәрәҗәсен киметүне тәэмин итәргә кирәк».

Узган ел Татарстанда 40 936 яңа туган бала теркәлгән, бу 2020 елга караганда 662 сабыйга кимрәк.

Теләче районында узган елда 131 бала туган. Әмма районда тискәре демография хисабына халыкның табигый кимүе теркәлгән, ул 73 кешене тәшкил итә.

«Туучылар саны, гаилә кыйммәтләрен популярлаштыру, яшь һәм күп балалы гаиләләргә ярдәм итү мәсьәләләре, сәламәтлек саклау һәм бала табуга ярдәм итү өлкәсендәге бурычлар район җитәкчелегенең өстенлекле игътибары өлкәсендә калырга тиеш», - диде Алексей Песошин.

Тормыш сыйфатын күтәрүнең мөһим шарты булып уңайлы әйләнә-тирә мохит һәм гражданнарны үз-үзләрен тоту өчен мөмкинлекләр булдыру тора. 2021 елда Татарстанда тормышка ашырылган 44 республика программасы, 12 федераль проект, 6 дәүләт программасы, программадан тыш һәм бюджеттан тыш чаралар нәкъ менә шуңа юнәлдерелгән иде.

Узган ел әлеге юнәлешләр буенча инфраструктура объектларын төзү һәм капиталь ремонтлау өчен кертелгән инвестицияләрнең гомуми күләме 96,5 млрд. сумнан артып киткән (96,581).

Республика программалары кысаларында Теләче районында да шактый эш башкарылган. 2021 елда Теләче районының тулаем территориаль продукты күләме 7 млрд. сум тәшкил иткән, бу шәһәр һәм районнар арасында 39 нчы урын.

Узган ел район предприятиеләре тарафыннан 3,74 млрд. сумлык сәнәгать продукциясе төяп озатылган (ТР буенча 32 нче урын). Сәнәгать җитештерүе индексы 108,1 % тәшкил иткән (ТР буенча 15 нче урын).

Республика районнары арасында АСКның тармак рейтингында Теләче районы 25 нче урында (2020 елдагы кебек үк), терлекчелек күрсәткечләре буенча – беренче унлыкта.

«Районның авыл хуҗалыгының барлык юнәлешләре буенча үз күрсәткечләрен алга таба яхшырту өчен җитәрлек потенциалга ия, - диде Алексей Песошин. -Яңа «Август-Теләче» агрофирмасы эшчәнлеге дә уңай якка үзгәрешләргә ярдәм итәргә тиеш. Якын киләчәктә инвестор тарафыннан районда терлекчелек торышын сизелерлек яхшыртачак яңа сөт комплексы төзү проекты гамәлгә ашырылыр дип өметләнәбез».

Кече һәм урта бизнеска икътисад үсешендә, керемнәрне һәм гражданнарны эш белән тәэмин итүдә зур потенциал бар. Теләче районының тулаем территориаль продуктында аның өлеше 43,4 % тәшкил итә (ТР буенча – 25,0 %). Республика шәһәрләре һәм районнары арасында Теләче 2 нче урында тора (Балтач районыннан югарырак – 44,0 %). Бу өлкәдә Теләче районы гадәттәгечә алдынгылар рәтендә.

Район Татарстан Республикасында кеше башына туры килгән кече һәм микропредприятиеләр әйләнеше буенча 2 нче урында, кече һәм урта эшкуарлык өлкәсендә эшләүчеләр саны буенча 11 нче урында тора. «Теләче» сәнәгать паркы нәтиҗәле эшли, резидентлар ел саен үзләренең җитештерү куәтләрен арттыралар. Шуның белән бергә парк мәйданнарының бер өлеше гамәлдә түгел. Булган резервлардан файдаланырга кирәк, бизнесны оештыру өчен барлык шартлар да бар, дип ассызыклады Татарстан Республикасы Премьер-министры.

Моннан тыш, районга авылда кече хуҗалыкларга ярдәм итү буенча эшне көчәйтергә кирәк. Узган ел әлеге рейтингта район 29 нчы урынны гына алган (2020 елда – 8 нче урын.). Моның сәбәбе – КФХларга, мини-фермаларга һәм кооперативларга ярдәм итү буенча дәүләт программаларында пассив катнашу.

«Соңгы елларда без медицина учреждениеләрен модернизацияләү буенча масштаблы чараларны гамәлгә ашырдык - беренчел звенодан алып югары технологияле үзәкләргә кадәр, бу республиканың сәламәтлек саклау системасына яңа чакыруларга лаеклы каршы торырга мөмкинлек бирә. Сәламәтлек саклау системасын модернизацияләү өлкәсендә Теләче районында да шактый эш башкарылды. Узган ел биредә Шармыш авылында модульле ФАП төзелеше тәмамланды. Агымдагы елда Алан авылында модульле ФАП төзү планлаштырыла. Район үзәк хастаханәсендә ремонт башланды. Матди өлешне үстерү белән беррәттән, медицина учреждениеләрен кадрлар белән тәэмин итү дә мөһим», - дип билгеләп үтте Алексей Песошин. Аның сүзләренә караганда, район хакимиятенә, ТР Сәламәтлек саклау министрлыгы белән берлектә, районга табибларны җәлеп итү буенча карарлар вариантларын табарга кирәк.

Соңыннан Татарстан Республикасы Премьер-министры район хакимиятенә, депутатлар корпусына, җирлек башлыкларына, предприятие һәм оешма җитәкчеләренә, Теләче районында яшәүчеләргә көндәлек киеренке хезмәтләре өчен рәхмәт белдерде.