Сергей Шойгу Татарстанга гражданнарны хәрби хезмәткә иң яхшы әзерләгән өчен РФ Оборона министрлыгы вымпелын тапшырды

Россия Федерациясе Оборона министрлыгының күчмә вымпелын бүген Россия оборона министры, армия генералы Сергей Шойгу Татарстан Республикасы Президенты Рөстәм Миңнехановка – Татарстан Республикасының Россия Федерациясе субъектлары арасында Россия Федерациясе гражданнарын хәрби хезмәткә иң яхшы әзерләүдә, 2012 елда хәрби хезмәткә чакыруны оештыруда җиңеп чыкканы өчен тапшырды.
Чара Чаллы шәһәрендә узды (Татарстан Республикасы), анда бүген Сергей Шойгу бер көнлек эш визиты белән килгән иде.
Россия Федерациясе Оборона министрлыгы конкурсы кысаларында исәпкә алу-чакыру эшен оештыру, хәрби хезмәткәр һөнәрен сайлауга юнәлешле эш, гражданнарны хәрби хезмәт нигезләренә әзерләү эше, шулай ук гражданнарны хәрби-патриотик тәрбияләү буенча эш нәтиҗәлелеге күрсәткечләре бәяләнде.
Конкурс йомгаклары буенча призлы урыннарны түбәндәге Россия Федерациясе субъектлары алды: беренче урында –Татарстан Республикасы (Үзәк хәрби округ), икенче урында – Курск өлкәсе (Көнбатыш хәрби округ), өченче урында – Краснодар крае (Көньяк хәрби округ).
Сергей Шойгу фикеренчә, яхшы күрсәткечләргә федерация субъектлары башкарма хакимияте органнарының, җирле үзидарә органнарының, хәрби комиссариатларның һәм иҗтимагый оешмаларның тыгыз хезмәттәшлеге нәтиҗәсендә генә ирешеп була.
Россия оборона министры билгеләп үткәнчә, Татарстан Республикасы “Россия Федерациясе гражданнарын хәрби хезмәткә иң яхшы әзерләгән, хәрби хезмәткә чакыруны оештырган һәм уздырган өчен” күчмә вымпелны алтынчы мәртәбә ала. Мондый нәтиҗәләргә әле Россия Федерациясенең бер генә субъекты да ирешмәгән, бу –Татарстан җитәкчелеге казанышы. “Бу субъектта хәрби хезмәткә чакырылучыларны әзерләү системасына зур игътибар бирелә, бу да - Татарстан Республикасы Президентының шәхси казанышы, ул яшьләр белән эшләүне оештыруга зур өлеш кертә. Ышанам ки, Россия Федерациясе Оборона министрлыгы белән Татарстан киләчәктә дә илебезнең оборона куәтен ныгытуда, гражданнарны Хәрби Көчләрдә хезмәт итүгә әзерләүдә бергәләп хезмәттәшлек итәр”,- диде Сергей Шойгу.
Россия оборона министры шулай ук Рөстәм Миңнехановка илнең оборона куәтен ныгытудагы казанышлары һәм гражданнарны хәрби хезмәткә әзерләүдәге югары күрсәткечләре өчен Россия Федерациясе Хөкүмәтенең Рәхмәт белдерүен тапшырды (Рәхмәт белдерүе Россия Федерациясе Хөкүмәтенең 2013 елның 6 июнендәге күрсәтмәсе белән расланган).
Моннан тыш, Сергей Шойгу Россия оборона министрының Мактау грамотасы белән Татарстан Республикасы Президенты Рөстәм Миңнехановны һәм Татарстан Республикасы Премьер-министрының беренче урынбасары Равил Моратовны бүләкләде – Россия Хәрби Көчләренә йөкләнгән бурычларны үтәгәндә ярдәм күрсәткәннәре, Татарстанның конкурста беренче урынны яулаганы өчен.