Кышкы каникулларда Татарстанда 64 савыктыру оешмасында 4,2 меңнән артык бала ял итәчәк

Кышкы каникуллар вакытында Татарстанның 21 районында урнашкан 64 савыктыру оешмасында 4,2 меңнән артык бала ял итәчәк. Шулай ук 2,5 меңгә якын бала өчен мәктәп яны лагерьлары да эшләячәк. Бу хакта бүген ТР Министрлар Кабинетында узган брифингта ТР яшьләр эшләре министры Тимур Сөләйманов хәбәр итте.

Брифинг балалар, яшүсмерләр һәм аларның ата-аналары өчен, шулай ук  Яңа ел каникуллары вакытында студентлар өчен кышкы ял оештыруга багышланган иде.

«28 декабрьдән Кырымда «Ак Барс» яңа лагеренда смена планлаштырылган. Анда ел дәвамында үзләрен активрак күрсәткән эре яшьләр берләшмәләре студентлары һәм лидерлары ял итәчәк», - дип өстәде ТР яшьләр эшләре министры.

Балалар лагерьларында иҗади, гражданлык-патриотик, спорт-савыктыру һәм туризм-туган якны өйрәнү юнәлешләре буенча сменалар узачак. Барлык нечкәлекләрне дә «Җәй» республика үзәге сайтында белергә була. Шулай ук 8 (843) 207-28-73 телефоны буенча кайнар линия эшли.

Быел Татарстанда 15 меңгә якын бала дәүләттән татлы Яңа ел бүләкләре алачак. Бу хакта брифингта ТР мәгариф һәм фән министры Илсур Һадиуллин хәбәр итте.

«Ел саен Татарстанда ТР Министрлар Кабинеты боерыгы нигезендә 18 яшькә кадәрге тормыш хәле кыен булган һәм ата-ана каравыннан мәхрүм калган балаларга, махсус коррекция мәктәпләрендә белем алучы балаларга  Яңа ел бүләкләре тапшырыла. Быел 15 меңгә якын бала Яңа ел бүләкләре алачак», - дип белдерде министр. Ул бүләкнең бәясе 800 сум тирәсе булачагын аңлатты.

Алдагы Яңа ел бәйрәмнәрендә Татарстанда туристларны 2021 ел белән чагыштырганда 10 процентка күбрәк көтәләр. Инде хәзер кайбер даталар өчен кунакханәләр тулуы 95-97% ка җитә. Мондый ихтыяҗ гыйнвар бәйрәмнәрендә дә дәвам итәр дип көтелә. Бу хакта брифингта ТР Туризм буенча дәүләт комитеты рәисе Сергей Иванов сөйләде.

«Декабрьнең соңгы көннәрендә без Казанда бик күп кунаклар күрәчәкбез. Без әзерләнәбез. Инде хәзер үк кунакханәләр тулуы 95-97% ка җитте. Ул 31 декабрьдән 9 гыйнварга кадәр дәвам итәр дип көтәбез. Якынча исәпләүләр буенча, Татарстан башкаласына яңа ел бәйрәмнәрендә  180 меңләп кеше киләчәк. Бу туризм үзәкләренә, җәмәгать туклануына һәм башка объектларга зур йөкләнеш», - дип белдерде Сергей Иванов.

Әгәр Татарстан халкы үзләре Яңа ел бәйрәмнәрен сәяхәттә үткәрүне өстен күрсә, Иванов бүгенге көндә Казаннан Шерегеш тау чаңгысы курорты урнашкан Новокузнецкка, Иркутскка туры рейслар оча, анда Байкалга, шулай ук башка шәһәрләргә эләгеп була, дип искәртте.

«Без әлеге шәһәрләрдән генә түгел, гражданнарыбызның ил буйлап сәяхәт итү һәм матур урыннарда булуларын телибез», — дип нәтиҗә ясады Сергей Иванов.

Алдагы Яңа ел каникулларында Татарстанның барлык районнарында спорт активлыгы оештырылачак, аларда, алдан исәпләүләр буенча, якынча 350 мең кеше катнашачак. Бу хакта бүген ТР Министрлар Кабинетында узган брифингта ТР спорт министры урынбасары Илдар Садриев хәбәр итте.

«Шәһәр һәм район халкы спорт фестивальләрен, турнирларны, гаилә стартларын, катнаш эстафеталарны, тимераякта шуу, чаңгы шуу һәм башка чараларны карый алачак. Барлык муниципаль берәмлекләрдә дә активлык планлаштырылган», - дип сөйләде спикер. Илдар Садриев киез итек киеп хоккей һәм кар өстендәге волейбол кебек традицион кышкы уеннарга да игътибар биреләчәген ассызыклады.

«Шулай ук өстәл теннисы буенча яңа ел турнирлары, өстәл теннисы, чаңгы ярышлары, җиңел атлетика, шахмат, шашка буенча район ярышлары, бадминтон буенча Раштуа турниры һәм башка бик күп ярышлар узачак. Балалар арасында Кыш бабай кубогы үткәреләчәк», - дип өстәде ТР спорт министры урынбасары.

Ул шулай ук республика халкын Яңа ел каникулларында тимераякта шуарга яки хоккей уйнарга чакырды. Бәйрәмнәр дәвамында Татарстанда барлык 49 боз аренасы һәм 600гә якын хоккей тартмасы эшләячәк.

Моннан тыш, профессиональ командалар матчларын да карарга була. Аерым алганда, «Ак Барс» ХК 28 декабрьдә Казанда - «Металлург» белән, 30ында «Нефтехимик» белән уйнаячак. УНИКС баскетбол клубы үз чиратында 4 гыйнварда МБА белән уйнаячак.

Яңа ел каникулларында Татарстан башкаласы буйлап өч урам театры: Казан театрларының берсе труппасы һәм шәһәр мәдәни үзәкләренең ике труппасы гастрольләргә чыгачак. Тамашалар җәмәгать киңлекләрендә һәм ишегалларында оештырылачак дип хәбәр итте Казан Башкарма комитетының мәдәният идарәсе башлыгы Азат Абзалов.

«Яңа ел бәйрәмнәре дәвамында Казанда өч урам театры гастрольләргә җыена. Бу көтелмәгән вакыйга һәм һәрвакыт игътибарны җәлеп итә. Шунысы куанычлы, без моны Казан актерлары көче белән эшлибез», — дип ассызыклады түрә.

Азат Абзалов шулай ук Яңа ел төнендә «Черек күл» паркындагы шугалакта һәм «Казан» гаилә үзәге янында Казан тамашачысы игътибарына концерт программалары тәкъдим ителәчәген әйтте. «Казан» гаилә үзәге янында Яңа ел төнендә чаралар - 31 декабрьнең 22.00 сәгатеннән 1 гыйнварның 2.00 сәгатенә кадәр, ә «Черек күл» шугалагында 22.00 сәгатьтән 3.00 сәгатькә кадәр узачак. Моннан тыш, Абзалов сүзләренчә, Чыршы шәһәрчекләрендә музыка уйнаячак һәм бу мәйданнар иртәнге сәгать өчкә кадәр яктыртылачак".

Спикер шулай ук ике төп мәйданчыкта Татарстан Президенты Рөстәм Миңнехановның һәм Россия Президенты Владимир Путинның Яңа ел мөрәҗәгатьләре трансляцияләнәчәген дә хәбәр итте.