Яңа ел каникулларында Татарстанда 1 меңнән артык мәдәни чара планлаштырылган
Яңа ел каникулларында Татарстанда 160 меңнән артык турист көтелә. Республика кунаклары һәм халкы өчен һәр районда 1 меңнән артык мәдәни чара һәм ким дигәндә 10 спорт чарасы планлаштырылган. Бүген ТР Хөкүмәте Йортында узган брифингта бәйрәм ялларын кайда уздыру турында сөйләделәр.
Яңа ел каникуллары көннәрендә Казанның җәмәгать киңлекләрендә 200ләп чара: концертлар, ярышлар, балалар иртәләре планлаштырылган, дип искәртте шәһәрнең Мәдәният идарәсе башлыгы Азат Абзалов.
Яңа ел каникулларында Татарстанның һәр муниципаль берәмлегендә ким дигәндә ун спорт чарасы уздыру планлаштырыла. Бу хакта республиканың спорт министры Владимир Леонов хәбәр итте. "1 гыйнвардан 8 гыйнварга кадәр без гадәттәгечә илдә спорт һәм сәламәтлек декадасын үткәрәбез. Һәр муниципаль берәмлектә спортның төрле төрләре буенча ким дигәндә ун спорт чарасы узачак», — дип аңлатты ул.
Пенсия яшендәге кешеләр арасында спорт чаралары, чаңгы ярышлары, хоккей турнирлары, шахмат һәм башка күп нәрсәләр планлаштырылган, дип төгәлләде В. Леонов. Яңа ел каникулларында бөтенроссия масштабындагы берничә зур турнир узачак. Әйтик, Татарстан башкаласы 10-15 гыйнварда чаңгы ярышлары буенча Россия Кубогының бишенче этабын кабул итәчәк. Ярышлар Мирный бистәсендә яңа чаңгы-биатлон комплексында узачак. Министр сүзләренчә, бу - Россия чаңгы ярышларында иң зур вакыйга.
Республика Яңа ел чыршысы 25 декабрьдә «Татнефть-арена»да узачак. Чарага 17 меңгә якын бала киләчәк, аларның күпчелеге – 9,2 меңе МХОдә катнашучылар балалары. Һәр яшь тамашачы татлылардан торган бүләк алачак, аның составы Роспотребнадзор белән килештерелгән инде, дип сөйләде журналистларга ТР яшьләр эшләре министры Ринат Садыйков.
Ул билгеләп үткәнчә, чыршыда чит шәһәр укучылары өчен кайнар ризык оештырылачак, ә алты муниципаль районнан килгән балалар өчен Казан шәһәре читендәге өч лагерьда урыннар әзерләнәчәк. Һава торышы бозылган очракта, шулай ук Казаннан китә алмаячак балалар өчен урыннар беректелгән. Моннан тыш, 24 һәм 25 декабрьдә, Республика чыршысын уздыру уңаеннан, Казанда ике урам буенча хәрәкәт ябылачак.
Татарстан Яңа ел бәйрәмнәрендә 160 меңнән артык турист кабул итәчәк, дип фаразлады ТР Туризм буенча дәүләт комитеты рәисе Сергей Иванов. "Бүгенге көндә кунакханәләрдә кунаклар саны инде бик югары - 85%тан артык. Һәм ул артуын дәвам итә. Быел табигатьтә ял итүгә өстенлек бирелә, республикада яшәүчеләрнең һәм кунакларның күпчелеге ял итү өчен нәкъ менә шундый объектларны сайлый", - дип шәрехләде ведомство башлыгы. Мондый объектларның күп өлеше ел әйләнәсе эшли һәм Россия Президенты Владимир Путин инициативасы белән оештырылган «Туризм һәм индустрия һәм кунакчыллык» илкүләм проекты буенча ярдәм алды.
Казанда, Свияжскта, Болгарда, Алабугада, Чистайда һәм 25 гыйнварга кадәр эшләячәк Кыш Бабай резиденциясендә туристлар күп булыр дип көтелә.
Яңа ел каникуллары көннәрендә республикада театрларда, музейларда, филармонияләрдә һәм башка учреждениеләрдә 1 меңнән артык мәдәни чара планлаштырылган, дип сөйләде Татарстан Республикасы мәдәният министрының беренче урынбасары Юлия Әдһәмова. "Быел без графикны үзгәрттек: барлык дәүләт музейлары һәм музей-тыюлыкларыбыз 31 декабрьдә 16.00 сәгатькә кадәр эшли, ә 1 гыйнварда алар үз эшләрен 11.00 сәгатьтән башлый», – дип йомгаклады Юлия Әдһәмова.
Яңа ел төнендә Татарстан башкаласында салют булмаячак. Казан Башкарма комитетының Мәдәният идарәсе башлыгы Азат Абзалов искәрткәнчә, 25 декабрьдән 8 гыйнварга кадәр Татарстан башкаласында махсус янгынга каршы режим гамәлдә булачак. Ул бенгал утларына һәм хлопушкаларга гына кагылмый, ә пиротехника куллануны тулысынча тыюны күздә тота. Фейерверкларны махсус билгеләнгән мәйданчыкларда гына эшләтеп була. Казанда бу Гаврилов урамындагы майдан, Нижнезареченская дамбасы, Каенлык Сабантуй мәйданчыгы каршындагы автомобильләр өчен тукталыш һәм Нәҗип Җиһанов һәм Петр Полушкин урамнары арасындагы ипподром янындагы мәйданчык.