Татарстан Премьер-министры Рөстәм Миңнеханов һәм “KP Chemical” президенты Хо Су Енг полиэтилентерефталат җитештерү буенча проектны тормышка ашыру турында фикер алыштылар

Бүген Татарстан Республикасы Премьер-министры Рөстәм Миңнеханов Татарстан Республикасы Министрлар Кабинетында “KP Chemical” компаниясе (“КП Кемикал”, Көньяк Корея) президенты Хо Су Енг әфәнде белән эшлекле очрашу үткәрде.
Анда “Алабуга” махсус икътисади зонасы (Татарстан Республикасы) территориясендә полимерлар (полиэтилентерефталат – ПЭТФ) җитештерү буенча комплекс төзү өлкәсендәге проектны тормышка ашыру турында сүз барды.
Шуны да искәртик: 2007 елның октябрендә “Ак Барс” банкы һәм Кореянең “KP Chemical” химия корпорациясе полимерлар (полиэтилентерефталат) җитештерү буенча комплекс төзү өлкәсендә хезмәттәшлек итү һәм уртак предприятие оештыру турындагы беркетмәгә кул куйдылар.
Татарстан Республикасы Премьер-министры бүгенге очрашуда билгеләп үткәнчә, проект җиңел булмаган икътисади шартларда тормышка ашырыла. Ләкин Татарстан Республикасы бу производствоны төзү белән бик кызыксына. Татарстан Республикасы Хөкүмәте башлыгы фикеренчә, полиэтилентерефталат җитештерү нәкъ менә дөнья икътисады нормага килгән вакытта җайга салынырга мөмкин.
Очрашуда катнашучы яклар киләчәк проектның логистика мәсьәләләре, шулай ук ПЭТФ (терефталат кислотасы) өчен чимал чыганаклары һәм күләме турында фикер алыштылар.
Рөстәм Миңнеханов проектка Татарстан Республикасы Хөкүмәте ярдәмен гарантияләде. Аның сүзләренә караганда, ПЭТФ производствосы республикадагы нефть-газ-химия комплексының киләчәктә үсеш программасына туры килә.
Очрашуда “Ак Барс” банкы идарәсе рәисе Роберт Миңнегалиев, нефть-газ-химия комплексы мәсьәләләре буенча Татарстан Республикасы Премьер-министры ярдәмчесе Ринат Сабиров һ.б. катнашты.